Муҳтож аёлларни уй-жой билан таъминлаш ишлари 10 фоиз ҳам бажарилмаган. Бу ҳақда 27 июль куни бўлиб ўтган Хотин-қизларнинг жамиятдаги ролини ошириш, гендер тенглик ва оила масалалари бўйича Республика комиссиясининг мажлисида Олий мажлис сенати раиси Танзила Норбоева айтиб ўтди, дея хабар бермоқда «Дарё» мухбири.
Мажлисда Сенат раиси Танзила Норбоева маълум қилишича, 2022—2023 йиллар давомида «аёллар дафтари» тизими орқали 12 минг нафар хотин-қизларни ижтимоий ижара шартлари асосида ижтимоий уй-жойларга жойлаштириш назарда тутилган.
«Биринчи ярим йиллик давомида бор-йўғи 581 нафари уй-жой билан таъминланган. Агар жорий йилда 6 минг нафар қизларни ижтимоий уй-жойларга жойлаштириш орқали уй-жой муаммосини ҳал этиш режалаштирилган бўлса, бу режа ҳали 10 фоизга ҳам бажарилмаган. Бу ишлар алоҳида тартиб асосида ташкил этилмайдиган бўлса, турли хил ижтимоий муаммоларни, хотин-қизлар орасида норозичиликларни келтириб чиқариши мумкин. Президент қарорни қабул қилиб, параметрларни белгилаб берганидан кейин, ҳозир аҳолимиз саводли, ўқиб, мана, биз ҳам шу тоифага кирамиз, деб турибди. Лекин 10 фоиз бўлса хотин-қизларда ишонч қоладими? Шу ҳужжатларга, шу қарорларга, умуман давлат сиёсатига ишонч қоладими?», — деди Норбоева хоним.
Сенат раисининг алоҳида таъкидлашича, «аёллар дафтари»га киритилган 430 минг нафар хотин-қизларга уларнинг таъмирталаб уй-жойларини таъмирлаш учун қурилиш материалларини олиб бериш ва таъмирлаш ишларини амалга ошириш бўйича топшириқ ҳам деярли бажарилмаган.
«Жорий йилда 15 минг нафар хотин-қизга уй-жойни таъмирлашга кўмаклашиш режалаштирилган бўлса, шу кунга қадар режа амалда 1 фоиздан кўпроққа бажарилган, холос. Ярим йил ўтди, нимани ўйлаяпсизлар? Ким буни назорат қиляпти? Нима тадбирбозликлар қилиб юрибсизлар пастда? Тадбирбозлик қилманглар, мана шундай аниқ ишлар билан шуғулланинглар», — деди юқори палата раҳбари.
Сенат томонидан танқид қилинган вазиятлар ижросига масъул бўлган идора сифатида Оила ва хотин-қизлар давлат қўмитаси раиси Зулайҳо Маҳкамова жавоб бериб ўтди.
«‘Аёллар дафтари» бўйича билдирилган эътирозлар Касаба уюшмалари федерациясида худди шу масала бўйича сектор раҳбарлари билан бирга ҳамкорликда муҳокамалар қилинганидан сўнг, ҳозир ҳар биттасини кунма-кун оляпмиз. Айнан таъмирга муҳтож ишларимиз орқада эди. Ҳозир бу бўйича ҳам анчагина муаммолар бор эди. Орттирилган бюджет қисмидан маблағлар ҳам жойига қўйилди. МИБдан тушадиган маблағлар айрим жойларда ўз вақтида тушмаганлиги сабабли кечикди. Буларнинг ҳаммасини жой-жойига қўйиб, ҳокимлар, қўшимча секторлар имтиёз ва имкониятлар бериб, бу масалага ҳам ойдинлик киритилди», — деди Зулайҳо Маҳкамова.
Изоҳ (0)