Ishtirokchi davlatlar, kun tartibidagi masalalar va tashkil etilgan sharoit. Toshkentda ShHT tashqi ishlar vazirlari uchrashuvi qanday o‘tishi aytildi

Toshkentda ShHT milliy koordinatorlar kengashi majlisi yakunlari hamda ShHTga a’zo davlatlar tashqi ishlar vazirlarining bo‘lajak yig‘ilishiga doir rejalarga bag‘ishlangan brifing tashkil etildi. Unda qator savollarga javob berib o‘tildi.

Xususan, Shanxay hamkorlik tashkilotiga a’zo davlatlar milliy koordinatorlari yig‘ilishi yakunlari haqida savol kelib tushdi. O‘zbekistonning ShHT ishlari bo‘yicha milliy koordinatori Rahmatulla Nurimbetov bunga quyidagicha javob qaytardi.

Tadbir joriy yilning 24—27-iyul kunlari Toshkent shahrida O‘zbekiston raisligida ShHTga a’zo barcha sakkiz davlatning milliy koordinatorlari ishtirokida an’anaviy shaklda bo‘lib o‘tdi. 4 kun davom etgan yig‘ilishda joriy yil 28—29-iyul kunlari Toshkent shahrida bo‘lib o‘tadigan ShHTga a’zo davlatlar tashqi ishlar vazirlari kengashida ko‘rib chiqish uchun taqdim etiladigan hujjatlar ro‘yxati loyihalari kelishib olindi. Shu bilan birga, milliy koordinatorlar joriy yil 15—16-sentabr kunlari bo‘lib o‘tadigan ShHT sammitiga tayyorgarlikning mazmuniy, tashkiliy-protokol masalalarini muhokama qildi, — dedi u.

Ta’kidlanishicha, uchrashuvda tashkilot faoliyatining amaldagi kun tartibidagi masalalar ham muhokama qilindi. Milliy koordinatorlar kengashi ShHTning joriy faoliyatini muvofiqlashtiruvchi va boshqaruvchi organi hisoblanadi. Aynan shu mexanizm doirasida davlat rahbarlari kengashi, hukumat rahbarlari (bosh vazirlar) kengashi va tashqi ishlar vazirlari kengashi yig‘ilishlariga zarur tayyorgarlik ishlarini olib boradi.

Brifingda, shuningdek, Shanxay hamkorlik tashkiloti tashqi ishlar vazirlari kengashining Toshkentdagi yig‘ilishida qaysi davlatlar qaysi darajada ishtirok etayotganiga aniqlik kiritildi.

O‘zbekiston Tashqi ishlar vazirligi rasmiy vakili Yusuf Qobiljonov bu savolga javob qaytardi.

Bugungi kunga qadar Shanxay hamkorlik tashkilotiga a’zo barcha davlatlar ShHT tashqi ishlar vazirlari kengashi yig‘ilishida ishtirok etishlarini tasdiqladi, xususan, Hindiston tashqi ishlar vaziri Subramanyam Jayshankar, Xitoy tashqi ishlar vaziri, davlat kengashi a’zosi Van I, Qozog‘iston bosh vaziri o‘rinbosari — tashqi ishlar vaziri Muxtor Tleuberdi, Qirg‘iziston tashqi ishlar vaziri Jenbek Kulubayev, Pokiston tashqi ishlar vaziri Bilaval Zardoriy, Rossiya tashqi ishlar vaziri Sergey Lavrov, Tojikiston tashqi ishlar vaziri Sirojiddin Muxriddin, ShHT bosh kotibi Chjan Ming va MATT Ijroiya qo‘mitasi direktori Ruslan Mirzayev, — dedi Qabiljonov.

Bundan tashqari, tashqi ishlar vazirlari kengashining bo‘lajak yig‘ilishi kun tartibidagi asosiy masalalar haqida ma’lumot berildi.

Afg‘oniston bo‘yicha xalqaro konferensiyadan so‘ng 28—29-iyul kunlari Toshkentda yana bir muhim xalqaro tadbir — ShHTga a’zo davlatlar tashqi ishlar vazirlarining yig‘ilishi bo‘lib o‘tmoqda. Yuqorida aytib o‘tilganidek, barcha tomonlar tashqi siyosat idoralari rahbarlari darajasida bo‘lib o‘tadigan uchrashuvda ishtirok etadi. Vazirlar uchrashuvi O‘zbekistonning ShHTga amaldagi raisligi davridagi muhim voqealardan biridir.

Tashqi ishlar vazirliklari rahbarlari tashkilot faoliyatining turli yo‘nalishlari bo‘yicha hamkorlikning bugungi holati va rivojlanish istiqbollarini muhokama qiladilar, dolzarb mintaqaviy va xalqaro muammolar yuzasidan fikr almashadi. Vazirlar uchrashuvining muhim jihatlaridan biri ShHTni kengaytirish istiqbollarini muhokama qilishdir. Xususan, ular ShHTning to‘laqonli a’zosi, a’zo davlati va muloqot bo‘yicha hamkori maqomini olish niyatini bildirgan 10 dan ortiq davlatlarning mavjud arizalarini ko‘rib chiqadi.

ShHT vazirlar kengashining Toshkent yig‘ilishining asosiy yakuni Samarqand sammitiga kiritiladigan hujjatlar loyihalarini ma’qullash bo‘ladi. Bu nafaqat ko‘p qirrali hamkorlikning an’anaviy yo‘nalishlarini, balki ShHT faoliyati sohasi istiqbollari, xususan, sanoat kooperatsiyasi, mintaqalararo savdo va transport aloqalari sohalarini qamrab olgan mustahkam hujjatlar to‘plamidir.

ShHT tashqi ishlar vazirlari kengashining bo‘lajak yig‘ilishi ikki tomonlama uchrashuvlar o‘tkazish hamda mintaqaviy va xalqaro kun tartibidagi dolzarb masalalar muhokamasi uchun yaxshi platforma bo‘lib xizmat qilishini alohida ta’kidlamoqchiman, — deya qayd etdi Yusuf Qabiljonov.

Rasmiy vakil tashqi ishlar vazirlari kengashining Toshkentdagi yig‘ilishini yoritish qanday tashkil qilinishi haqida ham gapirdi.

Unga ko‘ra, bo‘lajak tadbir, umuman, mamlakatning Shanxay hamkorlik tashkilotiga raisligi ommaviy axborot vositalari vakillarida katta qiziqish uyg‘otmoqda. 2022-yil 30-maydan 1-iyulgacha O‘zbekiston poytaxtida bo‘lib o‘tadigan ShHT tashqi ishlar vazirlari kengashi yig‘ilishini yoritish uchun arizalar qabul qilindi. 160 dan ortiq OAV vakillari, jumladan, 80 dan ortiq mahalliy muxbir va 75 dan ortiq xorijiy jurnalist akkreditatsiyadan o‘tkazildi. Yig‘ilish uchun matbuot markazi tashkil etilib, unda jurnalistlar faoliyati uchun barcha zarur tashkiliy-texnik sharoitlar yaratilgan.

Avvalroq Shavkat Mirziyoyev Shanxay hamkorlik tashkilotiga a’zo davlatlar tashqi ishlar vazirlari kengashining tadbirlarida ishtirok etish uchun mamlakatga kelgan Xitoy davlat kengashi a’zosi, tashqi ishlar vaziri Van Ini qabul qilgandi.