Buxoro viloyatining G‘ijduvon tumanida fermer shiyponidan 9 oylik bola topilgani xabar berilgandi. Ayni paytda shaxsi noma’lum bolaning onasi qidirilmoqda. Bu haqda “Daryo”ga viloyat IIB matbuot xizmati rahbari Shuhrat Jalolov ma’lum qildi.
Ta’kidlanishicha, fermer xo‘jaligiga qarashli yer maydoni tumanni kesib o‘tuvchi xalqaro ahamiyatga ega katta yo‘l yoqasida joylashgan. Shu bois bola qo‘shni viloyatlardagi fuqarolar tomonidan tashlab ketilgan bo‘lishi mumkin degan taxminlar ham bor.
“Fermer xo‘jaligi suvchisi bug‘doyzordagi bola haqida birinchi xabar topgan. Uning sergaklik bilan huquq-tartibot idoralariga xabar berishi bolaning hayoti saqlab qolinishiga sabab bo‘lgan. Bola tuman tibbiyot birlashmasiga olib borilgan. Ayni paytda bolaning onasi qidirilmoqda. Biroq uning shaxsi aniqlanmadi. Endi esa olti oydan bir yilgacha bo‘lgan muddat davomida farzandli bo‘lgan ayollarning qon tahlili olinadi. Kechiktirib bo‘lmas tekshiruv harakatlari davomida bolaning onasi topiladi. Bolani qarovsiz va ayanchli ahvolda tashlab ketgan shaxsi noma’lum fuqaroga nisbatan jinoyat ishi qo‘zg‘atilgan”, — deydi Shuhrat Jalolov.
Ma’lumotlarga ko‘ra, chaqaloqning tanasidagi kuyish jarohatlari uning quyosh tig‘i ostida qolib ketganidan dalolat beradi. U shifoxonaga besh foiz kuyish darajasi bilan yotqizilgan. Barcha tekshiruv va analizlar qilingan, ahvoli o‘rtacha.
Viloyat Sog‘liqni saqlash boshqarmasi boshlig‘ining birinchi o‘rinbosari Ixtiyor Abdulhaqov bola ayni paytda G‘ijduvon tuman tibbiyot birlashmasining bolalarni sog‘lomlashtirish bo‘limida shifokorlar nazoratida ekanini aytmoqda.
Izoh (0)