Соғлиқни сақлаш вазирлиги томонидан 23 июлдан 26 июлгача Андижон вилоятида ўтказилган соғломлаштириш акциясида республика ҳамда вилоятдаги мутахассислар томонидан 20 минг нафардан ортиқ фуқаролар чуқурлаштирилган тиббий кўрикдан ўтказилди. Бу ҳақда «Дарё» мухбири Умиджон Мамарасулов хабар бермоқда.
Вилоят соғлиқни сақлаш бошқармаси ахборот хизмати ходими Муфаззалшоҳ Муҳаммадиевнинг аниқлаштиришича, ўтган ҳафтада вазирлик марказий аппарати жамоаси, республика ихтисослаштирилган тиббиёт марказлари раҳбарлари ва шифокорлари, тиббиёт олий ўқув юртлари олимларидан ташкил топган жами 150 нафардан иборат махсус гуруҳ Андижон вилоятига келган.
Ишчи гуруҳ аъзолари энг чекка ва олис маҳаллалар, ҳатто хонадонларгача кириб бориб, сурункали касалликларга чалинган ва оғир дард туфайли қийин аҳволда қолган беморлар ҳолидан хабар олиниб, уларга зарур тиббий ёрдамлар кўрсатмоқда.
Сайёр қабул тарзида ўтаётган соғломлаштириш тадбирларида иштирокчилар рўйхатга олиниб, электрон тарзда тор соҳа мутахассислари кўригига йўналтирилмоқда. Шундан сўнг улар беморлик даражасига кўра таснифланиб, кўрсатиладиган тиббий хизмат ҳажми туман, вилоят ва республика миқёсида белгилаб олинмоқда.
Муаммоли масалалари бор фуқароларни эса Соғлиқни сақлаш вазирлиги мутасаддилари қабул қилиб, мурожаатларига тезкор ечим топиш чораларини кўрмоқда. Мураккаб жарроҳлик амалиётлари талаб этиладиган, бироқ даволанишга имкони йўқ аҳоли вакилларига шу жойнинг ўзида давлат ҳисобидан даволаниш учун йўлланмалар расмийлаштирилмоқда.
Маълумотларга кўра, тўрт кун давомида 20 минг нафарга яқин фуқаро тиббий кўрикдан ўтказилган. Уларнинг 11 минг нафарида турли касалликлар аниқланган. Беморларнинг 9 минг нафари амбулатор, 250 нафарига республика, 511 нафарига вилоят ҳамда минг нафарга яқинига эса туман миқёсидаги тиббиёт муассасаларида стационар даволаниш зарурлиги бўйича маслаҳатлар берилган. Жумладан, Хонобод шаҳрида яшовчи яна бир бемор, 8 ёшли Мадина Абдураҳимова тез-тез судирги бериши сабабли шифохонада доимий даволанишга мажбур. Сайёр тиббий кўрикда Мадинага Республика Педиатрия тиббиёт институти клиникасида даволаниши учун бепул йўлланма берилган.
«Ўттиз уч йилдан бери полиартрит ва қандли диабет хасталигидан азоб чекаман. Даволаниш учун барча ҳаракатларни қилиб кўрдим. Ҳаттоки, 2014 йилда жарроҳлик столига ҳам ётдим. Ўшандан кейин ўзимни озгина бўлса-да яхши ҳис қилаётгандим. Афсус хурсандлигим узоққа чўзилмади. Негадир сўнгги пайтларда касаллик яна қайта қўзғаб, зўрайиб, саломатлигим анча оғирлашди. Тошкентдан шифокорлар келди дейишганига хурсанд бўлгандим. Бироқ боролмаганим учун хафа бўлиб тургандим ўзлари уйимга кириб келишди ва тиббий кўрикдан ўтказишди. Шифокорлар вилоят марказида даволанишим учун бепул йўлланма беришди. Кунлар бир оз қайтиб қолса бориб, тегишли муолажаларни олиб келаман», — дейди бемор Марҳабо Умаралиева.
Бундан ташқари, тадбир доирасида шу кунларда вилоятдаги қатор тиббиёт муассасаларида пойтахтдан келган малакали шифокорлар бошчилигида кўплаб юқори технологияли жарроҳлик амалиётлари ҳам бажарилмоқда. Республика шошилинч тиббий ёрдам илмий маркази Андижон филиали ҳамда вилоят кўп тармоқли тиббиёт марказида бир қанча оғир беморларда мураккаб операциялар ўтказилмоқда.
Изоҳ (0)