Turkiya Ukraina portlaridan don eksporti bir hafta ichida qayta tiklanishi va yil oxirigacha 25 million tonnaga yetishi mumkinligini bildirdi. Bu haqda Bloomberg xabar berdi.
Bunga asos esa Ukraina va Rossiya o‘rtasidagi global oziq-ovqat inqirozi qo‘rquvini yengillashtirgan kelishuvdir.
Turkiya prezidenti Rajab Toyyib Erdo‘g‘onning matbuot kotibi Ibrohim Kalin Rossiya urushi tufayli to‘xtab qolgan eksport aynan qachon boshlanishi logistika asoslari bilan belgilanishini bildirdi.
Urush boshlanganda g‘alla va qishloq xo‘jaligi mahsulotlarini olib ketayotgan 100 ga yaqin kema Ukraina portlarida qolib ketgan.
Birlashgan Millatlar Tashkiloti birinchi eksport bir necha kun ichida boshlanishini kutmoqda.
“UkrAgroConsult” tahliliy firmasining ta’kidlashicha, Odessa, Chornomorsk va Pivdenniy kabi Qora dengiz portlarining maksimal umumiy quvvati oyiga 3,5 million tonnani tashkil qiladi.
Turkiya bugun — 27-iyulda Ukraina, Rossiya va BMT bilan kelishuv doirasida savdoni muvofiqlashtirish uchun qo‘shma operatsiyalar markazini ochishi kerak.
Kelishuvga erishilgandan so‘ng Rossiyaning Odessaga raketa zarbasi mamlakatning kelishuvga sodiqligiga shubha uyg‘otdi, ammo Kalin bu xavotirlarni rad etdi.
Avvalroq Rossiyaning Ukrainaga raketa zarbasidan so‘ng jahon bozorida bug‘doy narxi yana ko‘tarilgani haqida xabar berilgandi.
Izoh (0)