Туркия Украина портларидан дон экспорти бир ҳафта ичида қайта тикланиши ва йил охиригача 25 миллион тоннага етиши мумкинлигини билдирди. Бу ҳақда Bloomberg хабар берди.
Бунга асос эса Украина ва Россия ўртасидаги глобал озиқ-овқат инқирози қўрқувини енгиллаштирган келишувдир.
Туркия президенти Ражаб Тоййиб Эрдўғоннинг матбуот котиби Иброҳим Калин Россия уруши туфайли тўхтаб қолган экспорт айнан қачон бошланиши логистика асослари билан белгиланишини билдирди.
Уруш бошланганда ғалла ва қишлоқ хўжалиги маҳсулотларини олиб кетаётган 100 га яқин кема Украина портларида қолиб кетган.
Бирлашган Миллатлар Ташкилоти биринчи экспорт бир неча кун ичида бошланишини кутмоқда.
«УкрАгроConsult» таҳлилий фирмасининг таъкидлашича, Одесса, Чорноморск ва Пивденний каби Қора денгиз портларининг максимал умумий қуввати ойига 3,5 миллион тоннани ташкил қилади.
Туркия бугун — 27 июлда Украина, Россия ва БМТ билан келишув доирасида савдони мувофиқлаштириш учун қўшма операциялар марказини очиши керак.
Келишувга эришилгандан сўнг Россиянинг Одессага ракета зарбаси мамлакатнинг келишувга содиқлигига шубҳа уйғотди, аммо Калин бу хавотирларни рад этди.
Аввалроқ Россиянинг Украинага ракета зарбасидан сўнг жаҳон бозорида буғдой нархи яна кўтарилгани ҳақида хабар берилганди.
Изоҳ (0)