O‘zbekiston may oxiridan beri uch haftada 1,7 ming tonna shaftoli va nektarin eksport qildi, bu 2021-yilning shu davriga nisbatan 3 barobar ko‘pdir. Bu haqda EastFruit xabar bermoqda.
Keyingi haftalarda ushbu mahsulotlar eksporti shu darajada o‘sishda davom etdiki, joriy mavsum boshidan boshlab dastlabki ikki oyda — 2022-yil 21-maydan 20-iyulgacha — O‘zbekistondan shaftoli va nektarin eksporti hajmi j 2018—2021-yillarning shu davriga nisbatan rekord darajada qolmoqda.
Rasmiy statistik ma’lumotlarga ko‘ra, 2022-yilning 21-mayidan 20-iyuliga qadar O‘zbekiston jami 39,4 million dollarlik 40,6 ming tonna shaftoli va nektarini eksport qilgan.
Bu 2018, 2019 va 2021 yillarning shu davriga nisbatan jismoniy jihatdan ham, eksport tushumlari bo‘yicha ham kamida 1,5 barobar ko‘p ko‘rsatkichdir.
Agar 2020-yilning rekord ko‘rsatkichlari bilan solishtiradigan bo‘lsak, 2022-yilgi mavsumning dastlabki ikki oyida ushbu mahsulot eksporti hajmi 8,3 foizga kam, biroq, eksport tushumlari bo‘yicha 15,5 foizga ko‘p bo‘ldi.
Ya’ni, joriy yilgi eksport mavsumining dastlabki ikki oyida O‘zbekiston qiymati jihatidan rekord miqdorda – qariyb 40 million dollarlik shaftoli va nektarin eksport qildi.
Qayd etish joizki, 2018—2021-yillarda O‘zbekistondan shaftoli va nektarin eksporti mavsumi may oyining uchinchi o‘n kunligi boshidan erta boshlanmagan, shu bois, o‘tgan to‘rt yillikning xuddi shu davrlari bilan taqqoslov o‘rinlidir.
2022-yilning 21-mayidan 20-iyuligacha bo‘lgan davrda O‘zbekistondan shaftoli va nektarin eksportining deyarli butun hajmi YOII mamlakatlari bozorlariga jo‘natildi – jami eksportning 99 foizi, Turkmanistonga esa taxminan 1 foizi (373 tonna) yuborilgan.
So‘nggi ikki hafta ichida shaftoli va nektarinning o‘rtacha ulgurji narxlari 10 000 – 11 000 so‘m/kg darajasida qolmoqda, bu 2021-yilning shu davriga nisbatan o‘rtacha 14 foizga pastdir.
Shaftoli va nektarin meva segmentida O‘zbekiston eksport daromadining muhim manbai hisoblanadi.
Izoh (0)