Британия бош вазири лавозимига номзодлар Сунак ва Трасснинг жонли эфирдаги дебати бошловчи ҳушидан кетиб қолгани сабаб тўхтатилди (видео)

Буюк Британиянинг Консервативлар партияси раҳбарлиги учун курашаётган собиқ молия вазири Риши Сунак ва амалдаги ташқи ишлар вазири Лиз Трасс 26 июль куни кечқурун Талк ТВ телеканалида дебат ўтказди.

Дебат тахминан бир соат давом этиши режалаштирилган эди, бироқ ярим соат ўтгач, эфирни олиб бораётган бошловчи Кейт Макканн ҳушидан кетиб қолди. Шу сабаб дебатни тўхтатишга тўғри келди.

Маккенн ҳушини йўқотган лаҳза кадрга тушмаган – камера Украинадаги уруш ҳақида гапираётган Трассга қаратилган эди. Аммо кутилмаган вазиятдан гангиб қолган Трасс «О, Худойим!» деб хитоб қилди, шундан сўнг эфир тўхтатилди.

Телеканал матбуот хизмати Макканн ўзини яхши ҳис қилаётганига ишонтирди, аммо шифокорлар унга танаффус қилишни ва эфирга қайтмасликни тавсия қилган. Телеканал дебатни тўхтатишга тўғри келгани учун томошабинлардан узр сўради.

Кейт Макканн дебатни The Sun газетасининг сиёсий муҳаррири Гарри Коул билан олиб бориши режалаштирилган эди. Бироқ, дебат олдидан Коулнинг коронавирусга топширган тести мусбат чиққан ва Макканн учрашувнинг ягона модератори бўлиб қолган.

Сунак ва Трасс сайловларнинг биринчи босқичида консерватив депутатларнинг кўпчилик овозини қўлга киритиб, якуний босқичга чиққан эди. Энди Консерваторлар партиясининг барча аъзолари номзодлар учун овоз бериши керак. Янги раҳбар ким бўлиши 5 сентябрь куни маълум бўлади. Сунак парламентдаги овоз беришда етакчи эди, аммо ҳозир, сўровномаларга кўра, у машҳурлик бўйича Трассдан қуйида бормоқда.