Britaniyaning Nottingem shahrida tug‘ilgan havaskor bokschi Uisdom Oviave bo‘sh vaqtida shahar markaziga borib uysizlarning sochini bepul olib qo‘yish taklifini bermoqda.
“Yoshligimda klublarga borganman va bir necha bor janjal qilganim uchun hibsga olinganman. Ammo hozir men butunlay boshqa insonga aylanganman. Bu mening hayotiy tajribam va men ko‘p narsani anglash uchun ba’zi narsalarni boshdan kechirdim” , — deydi sportchi.
Ijtimoiy tarmoqlarda u o‘z hayotiy hikoyasini baham ko‘rdi va ko‘plab ijtimoiy tarmoq foydalanuvchilari buni qadrladi.
“Hayotda kimgadir yordam berish muhim ish va men boshqalarga yordam berishni xohlayman. Baxtli bo‘lishingiz uchun boshqalarni xursand qilishingiz, muayyan rolni o‘ynashingiz kerak. Men o‘z ishimni chin dildan bajaraman va ijtimoiy tarmoqdagi samimiy so‘zlari uchun barchaga minnatdorchilik bildirmoqchiman”, — dedi Uisdom.
U YouTube’dagi sartaroshlik darslarini ko‘rib birinchi o‘zining sochini olgan, chunki sartaroshxonalar pandemiya tufayli yopilgan edi. So‘ngra Oviave akasining sochlarini va boshqa odamlarning sochini olishni boshladi.
Bokschining aytishicha, u bepul soch olishdan tashqari uysizlarga oziq-ovqat va kiyim-kechak sotib oladi. “Men har doim odamlardan ularga nima kerakligini so‘rayman”, — deydi u.
Oviave bir marta politsiya unga ko‘chada uysizlarning sochini olganda axlat qoldirmasligiga ishonch bildirgani haqida ham gapirdi. U kollejda qurilish sohasi bo‘yicha tahsil olgan va hozir boks bilan shug‘ullanadi. Oviave professional bokschi bo‘lish niyati borligini aytdi.
Izoh (0)