Британиянинг Ноттингем шаҳрида туғилган ҳаваскор боксчи Уисдом Овиаве бўш вақтида шаҳар марказига бориб уйсизларнинг сочини бепул олиб қўйиш таклифини бермоқда.
«Ёшлигимда клубларга борганман ва бир неча бор жанжал қилганим учун ҳибсга олинганман. Аммо ҳозир мен бутунлай бошқа инсонга айланганман. Бу менинг ҳаётий тажрибам ва мен кўп нарсани англаш учун баъзи нарсаларни бошдан кечирдим» , — дейди спортчи.
Ижтимоий тармоқларда у ўз ҳаётий ҳикоясини баҳам кўрди ва кўплаб ижтимоий тармоқ фойдаланувчилари буни қадрлади.
«Ҳаётда кимгадир ёрдам бериш муҳим иш ва мен бошқаларга ёрдам беришни хоҳлайман. Бахтли бўлишингиз учун бошқаларни хурсанд қилишингиз, муайян ролни ўйнашингиз керак. Мен ўз ишимни чин дилдан бажараман ва ижтимоий тармоқдаги самимий сўзлари учун барчага миннатдорчилик билдирмоқчиман», — деди Уисдом.
У YouTube’даги сартарошлик дарсларини кўриб биринчи ўзининг сочини олган, чунки сартарошхоналар пандемия туфайли ёпилган эди. Сўнгра Овиаве акасининг сочларини ва бошқа одамларнинг сочини олишни бошлади.
Боксчининг айтишича, у бепул соч олишдан ташқари уйсизларга озиқ-овқат ва кийим-кечак сотиб олади. «Мен ҳар доим одамлардан уларга нима кераклигини сўрайман», — дейди у.
Овиаве бир марта полиция унга кўчада уйсизларнинг сочини олганда ахлат қолдирмаслигига ишонч билдиргани ҳақида ҳам гапирди. У коллежда қурилиш соҳаси бўйича таҳсил олган ва ҳозир бокс билан шуғулланади. Овиаве профессионал боксчи бўлиш нияти борлигини айтди.
Изоҳ (0)