O‘zbekiston prezidenti Shavkat Mirziyoyev Toshkentda o‘z ishini boshlagan “Afg‘oniston: xavfsizlik va iqtisodiy rivojlanish” mavzusidagi xalqaro konferensiyaning ishtirokchilariga murojaat yo‘lladi, deb xabar bermoqda “Daryo” muxbiri.
Prezidentning murojaatini Prezident huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari Abdulaziz Komilov o‘qib eshittirdi.
Murojaatda qayd etilishicha, “Amudaryoning narigi sohilida tinchlik bo‘lmasa O‘zbekistonda ham, butun Markaziy Osiyo mintaqasida ham xavfsizlik va barqaror taraqqiyotga erishib bo‘lmaydi”.
“Shu sababli o‘zining yangi tarixida chuqur ijtimoiy-iqtisodiy va gumanitar inqirozga duch kelayotgan Afg‘onistonga nisbatan e’tibor dunyoda tobora susayib borayotgani xavotir uyg‘otmasdan qolmaydi”, — deya ta’kidlanadi O‘zbekiston prezidentining forum ishtirokchilariga murojaatida.
Davlat rahbari o‘z murojaatida jahon hamjamiyati ushbu mamlakat bilan munosabatlarda avvalgi xatolarni qayta takrorlamaslik zarurligiga e’tibor qaratdi.
“Aminmizki, jahon hamjamiyati bugun 1990-yillardagi xatolarni qayta takrorlamaydi, ularni chetlab o‘ta oladi va shunga erishish lozim. Afg‘onistonning xalqaro maydonda yakkalab qo‘yilishi gumanitar vaziyatning yanada yomonlashuviga olib kelishi muqarrar, shu bois bunga yo‘l qo‘ymaslik muhimdir. Gap millionlab insonlarning taqdiri haqida bormoqda”, — deyiladi Shavkat Mirziyoyevning murojaatida.
Prezident Afg‘oniston rasmiylarining mamlakatni mojarodan keyingi tiklanish, mustaqil, barqaror va o‘zini o‘zi ta’minlaydigan davlat barpo etish borasidagi sa’y-harakatlarini rag‘batlantirish va qo‘llab-quvvatlashga chaqirdi.
Izoh (0)