Ўзбекистон президенти Шавкат Мирзиёев Тошкентда ўз ишини бошлаган «Афғонистон: хавфсизлик ва иқтисодий ривожланиш» мавзусидаги халқаро конференциянинг иштирокчиларига мурожаат йўллади, деб хабар бермоқда «Дарё» мухбири.
Президентнинг мурожаатини Президент ҳузуридаги Хавфсизлик кенгаши котибининг ташқи сиёсат ва хавфсизлик масалалари бўйича ўринбосари Абдулазиз Комилов ўқиб эшиттирди.
Мурожаатда қайд этилишича, «Амударёнинг нариги соҳилида тинчлик бўлмаса Ўзбекистонда ҳам, бутун Марказий Осиё минтақасида ҳам хавфсизлик ва барқарор тараққиётга эришиб бўлмайди».
«Шу сабабли ўзининг янги тарихида чуқур ижтимоий-иқтисодий ва гуманитар инқирозга дуч келаётган Афғонистонга нисбатан эътибор дунёда тобора сусайиб бораётгани хавотир уйғотмасдан қолмайди», — дея таъкидланади Ўзбекистон президентининг форум иштирокчиларига мурожаатида.
Давлат раҳбари ўз мурожаатида жаҳон ҳамжамияти ушбу мамлакат билан муносабатларда аввалги хатоларни қайта такрорламаслик зарурлигига эътибор қаратди.
«Аминмизки, жаҳон ҳамжамияти бугун 1990 йиллардаги хатоларни қайта такрорламайди, уларни четлаб ўта олади ва шунга эришиш лозим. Афғонистоннинг халқаро майдонда яккалаб қўйилиши гуманитар вазиятнинг янада ёмонлашувига олиб келиши муқаррар, шу боис бунга йўл қўймаслик муҳимдир. Гап миллионлаб инсонларнинг тақдири ҳақида бормоқда», — дейилади Шавкат Мирзиёевнинг мурожаатида.
Президент Афғонистон расмийларининг мамлакатни можародан кейинги тикланиш, мустақил, барқарор ва ўзини ўзи таъминлайдиган давлат барпо этиш борасидаги саъй-ҳаракатларини рағбатлантириш ва қўллаб-қувватлашга чақирди.
Изоҳ (0)