Toshkentda 25—26-iyul kunlari “Afg‘oniston: xavfsizlik va iqtisodiy rivojlanish” mavzusidagi Afg‘oniston bo‘yicha xalqaro konferensiyasi bo‘lib o‘tmoqda, deb xabar berdi “Daryo” muxbiri.
Unda O‘zbekiston tashqi ishlar vaziri vazifasini bajaruvchi Vladimir Norov ma’ruza qildi. Vazir o‘z nutqida Afg‘oniston hukumati oldida turgan muhim vazifalarni sanab o‘tdi.
“Muvaqqat hukumat tomonidan xalqaro hamjamiyatning asosiy talablari, jumladan, keng vakillikka asoslangan inklyuziv hukumat tuzish, xotin-qizlar huquqlarini ta’minlash va milliy ozchiliklar, shuningdek, afg‘onlarning to‘la huquqli maktab ta’limiga qabul qilinishi bo‘yicha zudlik bilan amalga oshirilishi kerak bo‘lgan vazifalarni ta’kidladi. Bu butun afg‘on xalqi uchun tinch kelajak kafolatidir”, — dedi O‘zbekiston TIV rahbari.
Shundan so‘ng O‘zbekiston prezidentining tashqi siyosat masalalari bo‘yicha maxsus vakili Abdulaziz Komilov O‘zbekiston prezidenti Shavkat Mirziyoyevning konferensiya ishtirokchilariga murojaatini o‘qib eshittirdi.
O‘zbekiston tashqi ishlar vaziri v.b. Vladimir Norov Birlashgan Millatlar Tashkiloti Bosh kotibi Antonio Gutterishning konferensiya ishtirokchilariga yo‘llagan tabrigini o‘qib eshittirdi.
Konferensiyaning ochilish marosimida Afg‘oniston tashqi ishlar vaziri v.b. Amirxon Muttaqiy ma’ruza qildi.
Nufuzli tadbirda Markaziy va Janubiy Osiyo, Yevropa, Amerika, Yaqin va O‘rta Sharq, Osiyo-Tinch okeani mintaqalarining Afg‘onistonda barqarorlikni tiklashga bevosita jalb etilgan 20 dan ortiq davlatning Afg‘oniston bo‘yicha maxsus vakillari, o‘nlab xalqaro va mintaqaviy tashkilotlar, jumladan, BMT, Yevropa Ittifoqi, BMTning Oziq-ovqat va qishloq xo‘jaligi tashkiloti (FAO), Iqtisodiy hamkorlik tashkiloti, Islom hamkorlik tashkiloti, Shanxay hamkorlik tashkiloti rahbarlari va mutaxassislari, shuningdek, Afg‘oniston Muvaqqat hukumati delegatsiyasi ishtirok etmoqda.
Anjumanda Afg‘onistonni ijtimoiy-iqtisodiy jihatdan tiklash, afg‘on xalqining hozirgi va kelgusi avlodlari uchun uzoq kutilgan tinch hayotni ta’minlashga qaratilgan infratuzilma va ijtimoiy loyihalarni amalga oshirish va boshqa bir qator dolzarb masalalar ko‘rib chiqiladi.
Shuningdek, xalqaro konferensiya doirasida qo‘shni Afg‘onistonda iqtisodiy barqarorlikni tiklashga qaratilgan gumanitar va infratuzilma loyihalar taqdimoti ham bo‘lib o‘tadi.
Izoh (0)