AQSH prezidenti Jo Baydenning ma’muriyati maymunchechak tarqalishi sababli favqulodda holat joriy etish masalasini ko‘rib chiqmoqda, deb yozadi The Washington Post vaziyatdan xabardor uchta anonim manbaga tayanib.
JSST maymunchechak epidemiyasini jamoat salomatligi uchun favqulodda holat deb e’lon qilganidan so‘ng, Oq uy va sog‘liqni saqlash agentligi rahbarlari virusga qarshi kurashish choralarini muhokama qilish uchun yig‘ilish o‘tkazdi.
Yig‘ilishda rasmiylarning bir guruhi hukumatga virus tarqalishi to‘g‘risidagi ma’lumotlarni byurokratik to‘siqlarsiz to‘plash imkonini berish uchun favqulodda holat e’lon qilishni talab qildi. Yana bir guruh amaldorlarning ta’kidlashicha, bu harakat ramziy ma’noga ega bo‘ladi va vaksina tanqisligi muammosini hal qilmaydi. Yig‘ilganlar AQSHda favqulodda holat e’lon qilish asosli bo‘lishiga shubha bildirdi, chunki mamlakatda maymunchechakdan hali hech kim o‘lmagan.
AQSH rasmiylari favqulodda vaziyat bo‘yicha yakuniy qarorni shu haftada chiqarishga umid qilmoqda.
Ma’lumot uchun, maymunchechak kam uchraydigan virusli kasallik bo‘lib, asosan markaziy va g‘arbiy Afrikaning chekka hududlaridagi tropik o‘rmonlar yaqinida uchraydi. Ushbu kasallikni hayvondan odamga yuqtirishning birinchi holati 1970-yilda Kongo hududida qayd etilgan. JSST ma’lumotlariga ko‘ra, bu virus odamlarga kemiruvchilar va yovvoyi hayvonlardan yuqadi. Odatda, maymunchechak epidemiyasidan o‘lim darajasi 1 foizdan 10 foizgachani tashkil etadi. O‘limlar asosan yoshlar orasida sodir bo‘ladi. Maymunchechakka qarshi maxsus emlash usuli yo‘q, ammo chechakka qarshi emlash bu kasallikdan 85 foiz darajada himoya qiladi.
Izoh (0)