Буюк Британия Алишер Усмоновнинг жиянлари ҳамда 29 нафар россиялик губернаторга қарши санкциялар киритди

Буюк Британия Россиянинг Украинага босқини сабаб яна 42 кишига нисбатан санкциялар жорий қилди. Янгиланган санкциялар рўйхати Британия ҳукумати сайтида эълон қилинган.

Британия санкциялари остига, жумладан, тадбиркор Алишер Усмоновнинг жиянлари Сарвар ва Санжар Исмоиловлар тушган.

Шунингдек, Буюк Британия Россиянинг 29 та ҳудуди губернаторларига нисбатан санкциялар киритди. Улар орасида Андрей Воробев (Москва вилояти губернатори), Александр Богомаз (Брянск вилояти), Роман Старовойт (Курск вилояти), Евгений Куйвашев (Свердловск вилояти), Алексей Текслер (Челябинск вилояти), Владимир Уйба (Коми) бор.

Россия адлия вазири Константин Чуйченко ва унинг ўринбосари Олег Свириденко ҳам санкциялар остида қолган. Бундан ташқари, Sputnik International бош муҳаррири Антон Анисимов, британиялик блогер Грем Fillips, ўзини ўзи республика деб эълон қилган ЛХР вакиллари, шунингдек, Сурия ва Фаластиндан келган муҳожирларга ҳам чекловлар жорий этилди.