Maymunchechakning tarqalishi sog‘liqni saqlash sohasida favqulodda holat deb e’lon qilindi

Jahon sog‘liqni saqlash tashkiloti (JSST) bosh direktori Tedros Adhanom Gebreyesus maymunchechak epidemiyasi butun dunyo bo‘ylab o‘rtacha xavf tug‘dirishi, uning tarqalishi esa sog‘liqni saqlash sohasida favqulodda holat ekanini e’lon qildi.

Gebreyesus 23-iyul, shanba kuni bo‘lib o‘tgan brifingda tegishli qaror qabul qilinganini ma’lum qildi.

Bizda yangi yuqish usullari orqali dunyo bo‘ylab tez tarqaladigan va xalqaro sog‘liqni saqlash qoidalari mezonlariga javob beradigan epidemiya mavjud. Maymunchechak epidemiyasi sog‘liqni saqlash tizimida xalqaro ahamiyatga ega bo‘lgan favqulodda holatga aylandi, — dedi u.

Maymunchechak kasalligi [tarqalish] xavfi global miqyosda va Yevropadan tashqari barcha mintaqalarda o‘rtacha deb baholangan, — ta’kidladi tashkilot rahbari.

JSST rahbari ayni paytda jahon hamjamiyati epidemiyani nazorat ostiga olish va virus tarqalishini to‘xtatish uchun barcha imkoniyatga ega ekanini ta’kidladi. JSST vakillarining so‘zlariga ko‘ra, hozirgacha infeksiya holatlari aniqlangan mamlakatlarning qariyb yarmi vaksinalardan foydalanish imkoniyatiga ega bo‘lgan.

Ma’lumot uchun, maymunchechak kam uchraydigan virusli kasallik bo‘lib, asosan markaziy va g‘arbiy Afrikaning chekka hududlaridagi tropik o‘rmonlar yaqinida uchraydi. Ushbu kasallikni hayvondan odamga yuqtirishning birinchi holati 1970-yilda Kongo hududida qayd etilgan. JSST ma’lumotlariga ko‘ra, bu virus odamlarga kemiruvchilar va yovvoyi hayvonlardan yuqadi. Odatda, maymunchechak epidemiyasidan o‘lim darajasi 1 foizdan 10 foizgachani tashkil etadi. O‘limlar asosan yoshlar orasida sodir bo‘ladi. Maymunchechakka qarshi maxsus emlash usuli yo‘q, ammo chechakka qarshi emlash bu kasallikdan 85 foiz darajada himoya qiladi.