Amerikalik erkak koronavirus va maymunchechak bilan bir vaqtning o‘zida kasallandi

Kaliforniyada yashovchi erkakda koronavirus aniqlangandan keyin maymunchechak kasalligi bilan chalingani ham ma’lum bo‘ldi.

“Shifokor mening maymunchechak bilan kasallanganim va tanamda koronavirus ham borligiga amin edi. Shifokorda men ikki kasallikka bir vaqtda chalinish mumkinmi, deb so‘raganimda u, ha, dedi”, – deydi bemor Mitcho Tompson.

Tompsonning so‘zlariga ko‘ra, ikkita virus yuqtirgani tufayli u bir necha hafta davomida o‘zini “dahshatli gripp”ga chalingandek his qilgan.

“Eng yomoni, rostini aytsam, to‘shakdan zo‘rg‘a turdim va hatto bir qultum suv ham icholmay qoldim”, – deydi Tompson.

Stenford universitetining tibbiyot professori va yuqumli kasalliklar bo‘yicha mutaxassisi Din Uinslou bir vaqtning o‘zida maymunchechak va koronavirusga chalinish ehtimoli past bo‘lsa-da, bu mumkinligini ta’kidladi. Shifokor Tompson bilan bo‘lgan voqeani “aql bovar qilmaydigan omadsizlik”, deb atadi.