Жаҳон соғлиқни сақлаш ташкилоти (ЖССТ) бош директори Тедрос Адҳаном Гебрейесус маймунчечак эпидемияси бутун дунё бўйлаб ўртача хавф туғдириши, унинг тарқалиши эса соғлиқни сақлаш соҳасида фавқулодда ҳолат эканини эълон қилди.
Гебрейесус 23 июль, шанба куни бўлиб ўтган брифингда тегишли қарор қабул қилинганини маълум қилди.
Бизда янги юқиш усуллари орқали дунё бўйлаб тез тарқаладиган ва халқаро соғлиқни сақлаш қоидалари мезонларига жавоб берадиган эпидемия мавжуд. Маймунчечак эпидемияси соғлиқни сақлаш тизимида халқаро аҳамиятга эга бўлган фавқулодда ҳолатга айланди, — деди у.Аввалроқ ЖССТ фавқулодда қўмитаси 21 июль куни бўлиб ўтган иккинчи йиғилишда бу масала бўйича консенсус (келишув)га кела олмаган эди. Ташкилот раҳбарининг сўзларига кўра, ҳозирда 75 та давлат ва ҳудудда 16 мингдан ортиқ инфекция ҳолати қайд этилган ва беш киши вафот этган.
Маймунчечак касаллиги [tarqalish] хавфи глобал миқёсда ва Европадан ташқари барча минтақаларда ўртача деб баҳоланган, — таъкидлади ташкилот раҳбари.Маймунчечакка қарши қандай курашилмоқда?
ЖССТ раҳбари айни пайтда жаҳон ҳамжамияти эпидемияни назорат остига олиш ва вирус тарқалишини тўхтатиш учун барча имкониятга эга эканини таъкидлади. ЖССТ вакилларининг сўзларига кўра, ҳозиргача инфекция ҳолатлари аниқланган мамлакатларнинг қарийб ярми вакциналардан фойдаланиш имкониятига эга бўлган.
Маълумот учун, маймунчечак кам учрайдиган вирусли касаллик бўлиб, асосан марказий ва ғарбий Африканинг чекка ҳудудларидаги тропик ўрмонлар яқинида учрайди. Ушбу касалликни ҳайвондан одамга юқтиришнинг биринчи ҳолати 1970 йилда Конго ҳудудида қайд этилган. ЖССТ маълумотларига кўра, бу вирус одамларга кемирувчилар ва ёввойи ҳайвонлардан юқади. Одатда, маймунчечак эпидемиясидан ўлим даражаси 1 фоиздан 10 фоизгачани ташкил этади. Ўлимлар асосан ёшлар орасида содир бўлади. Маймунчечакка қарши махсус эмлаш усули йўқ, аммо чечакка қарши эмлаш бу касалликдан 85 фоиз даражада ҳимоя қилади.
Изоҳ (0)