Тошкент шаҳрида трамвай ҳаракатини тиклаш лойиҳасининг техник-иқтисодий асосларини ишлаб чиқиш жараёнини август ойида якунлаш режалаштирилган. Бу ҳақда халқ депутатлари кенгашининг 15 июль куни бўлиб ўтган сессиясида шаҳар транспорт бошқармаси бошлиғи Анвар Жўраев маълум қилди.
Унинг сўзларига кўра, трамвай чоксиз бириккан рельслар орқали «шовқинсиз» ҳаракатланади. Техник-иқтисодий асосларни ишлаб чиқиш учун эса хорижлик мутахассислар жалб этилган.
Анвар Жўраевнинг айтишича, икки йўналишда — ТТЗ ва «Ипподром»дан Шимолий вокзалгача бўлган йўналиш бўйича таклифлар тайёрланган.
Президентга икки йўналишда таклифлар тайёрлаяпмиз. Биринчиси, ТТЗ массивидан Шимолий вокзалгача, лойиҳа икки босқичда амалга оширилади. Иккинчи йўналиш эса Чилонзор кийим-кечак савдо мажмуасидан, яъни «Ипподром»дан Шимолий вокзалгача.Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва «Ипподром» ўртасида қатновчи 17-йўналиш ёпилганди.Нега биз бу икки нуқтани танладик? Ушбу икки пункт орқали Тошкент вилоятидан шаҳарга катта йўловчилар оқими кириб келади. Бу транспорт оқимининг кириб келишига йўл қўймаслик учун биз бу ерда (метро йўналишлари) такрорланмайдиган трамвай йўналишларини белгилаяпмиз, — деди бошқарма бошлиғи.
Шавкат Мирзиёев 2022 йил 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди. Давлат раҳбари 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтганди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган эди президент.
Тошкент шаҳар ҳокими ўринбосари Бахтиёр Раҳмонов 16 февраль куни пойтахт ҳокимлигида бўлиб ўтган матбуот анжуманида Навоий кўчасида трамвай бўлмаслигини айтган эди. Транспорт бошқарма бошлиғи Анвар Жўраев эса трамвай бўйича таклифлар борлигини билдирганди.
Шунингдек, Беларусь Тошкентда трамвайни қайта тиклаш лойиҳасида иштирок этишни режалаштираётгани маълум бўлган.
Изоҳ (0)