Krishtianu Ronaldu faoliyatini davom ettirishi uchun ikkita variant mavjud.
Portugaliyalik futbolchi “Manchester Yunayted”dan o‘zini transferga qo‘yishini talab qilmoqda — u uchun eng ma’qul variant Chempionlar Ligasida o‘ynaydigan klubga o‘tish.
L’Equipe nashri xabariga ko‘ra, Ronaldu Saudiya Arabistoni klubi tomonidan taklif qilingan katta maoshli shartnomani rad etgan. Mahalliy klublardan biri mankunianliklarga transfer uchun 30 million yevro, yana 20 million yevro futbolchining agentiga komissiya sifatida, shuningdek, 2 yillik shartnoma uchun 250 million yevro maosh taklif qilgan.
Undan tashqari “Sporting” ham Ronalduga qiziqish bildirayotgani, ammo Portugaliya klubi taklifi ham rad etilgani xabar qilindi.
Shu tariqa 37 yoshli hujumchi faoliyatini davom ettirishi uchun ikkita variant qoldi — yo “Atletiko”ga o‘tish, yoki “Manchester Yunayted”da qolish. Madrid jamoasi Ronalduni o‘z safiga qo‘shib olmoqchi va uning talablarini qondira olishiga ko‘zi yetmoqda.
Qayd etilganidek, portugaliyalikning “qizil iblislar” safida qolish ehtimoli past. Agent Jorje Mendesh ham mijozining ketishini istamoqda. Uning fikricha, Ronalduga Chempionlar Ligasida o‘ynaydigan klub topilmayotgani, futbolchining obro‘siga putur yetkazadi.
Izoh (0)