«Барселона» «Реал» тарбияланувчисини сотиб олиши мумкин

«Барселона» «Тоттенҳэм» ҳимоячиси Серхио Регилонга қизиқиш билдирмоқда.

Каталония клуби раҳбарияти чап қанот ҳимоясини ҳам кучайтириш керак деб ҳисоблайди. Бироқ биринчи навбатда ҳимоя марказида тўп сурадиган Жюл Кунде («Севилья») ва ўнг қанот ҳимоячиси Цезарь Аспиликуэта («Челси») билан шартнома имзолашни мақсад қилган.

«Челси» шарафини ҳимоя қилувчи Маркос Алонсо ҳам «Барселона» сотиб олишни кўзлаётган футболчилардан бири. Аммо 31 ёшли Алонсо трансфери бўйича келишувга эришилмаса, чап қанотни кучайтириш учун альтернатив вариантлар мавжуд.

Mundo Deportivo нашрининг хабарига кўра, Серхио Регилон эҳтимолий трансфер рўйхатидан жой олган.

Бир неча ҳафта олдин 25 ёшли футболчининг агенти Kиа Журабчиан «кўк-анорранглилар» раҳбариятига мижози трансферлар учун очиқ эканини билдирган. Регилоннинг чап қанот ҳимояси учун энг яхши вариантлигига асосий сабаблардан бири — унинг трансфер нархи арзонлигидир.

19 июль куни Журабчиан Майамида Матеу Алемани ва Йорди Кройфф билан учрашган. Киа «Барселона» дарвозабони Нетонинг ҳам агенти ҳисобланади. Томонлар Хави режаларига кирмаётган 33 ёшли посбоннинг ҳам келажагини муҳокама қилган. Нето «Сельта»га ўтиш таклифини рад этганди.

Регилон — «Реал» тарбияланувчиси ҳисобланади. У 2005 йилда клуб тизимига қабул қилинган. Бир нечта клубларда ижарада ўйнаганидан сўнг Серхио Мадридни тарк этиб, 25 миллион эвазига «Тоттенҳэм» таркибига ўтганди.

«Реал» 40 миллион евро эвазига ҳимоячини сотиб олиш ҳуқуқига эга.