O‘zbekistonda joriy yilning birinchi yarmida 276 ming tonna suyuq uglevodorod qazib olindi, bu o‘tgan yilning shu shu davridan 9 foizga ko‘p. Bu haqda “Daryo”ga “Sanoat Energetika Guruhi” kompaniyasi ma’lum qildi.
G‘arbiy Toshli, Sharqiy Toshli, Yangi Qoratepa, Shimoliy Sho‘rtan, Xo‘jaosmon kabi konlarda olib borilgan geologik-texnik tadbirlar birinchi olti oyda o‘sishni ta’minlab berdi.
Shuningdek, neft qazib olish hajmining oshishi Chegara, Sardoba va Shimoliy O‘rtabuloq konlarida ekspluatatsion burg‘ilash hamda qiya yo‘naltirilgan burg‘ilash ishlari natijasida ta’minlandi.
2022-yil 1-iyul holatiga ko‘ra o‘rtacha sutkalik uglevodorod qazib olish hajmi 1,7 ming tonnadan sal ko‘proqni tashkil etdi.
O‘tgan yilning shu davridagi ko‘rsatkichlar 1 468 tonna darajasida edi. Shu tariqa, sutkalik qazib chiqarishning o‘sishi 16 foizdan oshdi.
Bugungi kunga qadar korxona mahsulotlarini yetkazib berish bo‘yicha 902 ta mijoz bilan shartnomalar tuzilgan.
Bular qatorida Germaniya, Buyuk Britaniya, Polsha, Qozog‘iston va Tojikiston kabi mamlakatlar kompaniyalari bor.
“Asosiy fondlarni kapital ta’mirlash” dasturi doirasida joriy yilning birinchi yarmida 20,3 mlrd so‘mlik investitsiyalar o‘zlashtirildi, 93 ta obyekt ta’mirlandi.
O‘tgan yilning shu davriga nisbatan qurib bitkazilgan obyektlar soni 15 taga ko‘paydi.
“Asosiy fondlarni kapital qurilish – neft qazib olish” dasturini amalga oshirish doirasida o‘tgan davr mobaynida 24 ta obyekt bo‘yicha 67 mlrd so‘m o‘zlashtirildi.
Kompaniya neft qazib olish uchun yangi asosiy fondlarni yaratish va eskilarini saqlashga qaratilgan har ikkala dasturni ham faol amalga oshirishda davom etmoqda.
Sheriklik huquqi asosida
Izoh (0)