Toshkent birinchi, Sirdaryo oxirgi: O‘zbekistonda eng ko‘p chakana savdo amalga oshirilgan hududlar ma’lum qilindi

Davlat statistika qo‘mitasi 2022-yil yanvar—iyun oylari bo‘yicha chakana savdo aylanmasini e’lon qildi.

Respublika bo‘yicha chakana savdo aylanmasi 134,1 trln so‘mni tashkil etdi. Bu 2021-yilning yanvar—iyun oylariga nisbatan 9,9 foizga ko‘p.

Barcha hududlarda o‘sish sur’atlari kuzatildi. Tarkibiy qismlari 77,3 foiz kichik biznes va xususiy tadbirkorlik subyektlari va 22,7 foiz yirik korxonalar hissasiga to‘g‘ri keldi.

Tovar aylanmasida eng yuqori ulush Toshkent shahrida — 25,5 foiz, ya’ni 34,2 trln so‘m.

Keyingi o‘rinlarda Toshkent (13,6 trln so‘m), Samarqand (11,09 trln so‘m) va Farg‘ona (10,7 trln so‘m) viloyatlari joylashgan.

Respublika chakana savdo tovar aylanmasida eng quyi ulushni Sirdaryo viloyati 1,5 foiz bilan 2,04 trln so‘mni tashkil etdi.

Yirik korxonalarning tovar aylanmasi hajmi, 2021-yilning yanvar—iyun oylariga nisbatan 30,9 foizga o‘sdi. Bu 30,4 trln so‘mga teng.

Bu esa umumiy savdo hajmining 22,7 foiz ulushiga to‘g‘ri keldi.

Kichik biznes va xususiy tadbirkorlik subyektlarining chakana savdo tovar aylanmasi hajmi 103,7 trln so‘mni tashkil etib, 2021-yilning yanvar—iyun oylariga nisbatan 5 foizga ko‘paydi.

Respublika miqyosida ushbu sektorning jami ulushi 77,3 foizni tashkil etdi.

Kichik biznes va xususiy tadbirkorlik subyektlarining ulushi bo‘yicha Surxondaryo (92,1 foiz), Sirdaryo (91,7 foiz), Namangan (91 foiz) viloyatlari yetakchilik qilmoqda.

Yirik korxonalarning ulushi 22,7 foizni tashkil etib, eng katta ulush Toshkent shahrida (39,3 foiz), Toshkent (30,3 foiz), Xorazm (22,5 foiz) va Samarqand (21,8 foiz) viloyatlarida kuzatildi.

2022-yilning yanvar—aprel oylari holatiga ko‘ra, o‘rtacha aholi jon boshiga chakana savdo tovar aylanmasi 3,7 mln so‘mni tashkil etdi. Bu ko‘rsatkich 2021-yilning mos davriga nisbatan 7,7 foizga oshgan.