Gentra ikki barobar ko‘paygan: O‘zbekistonda iyun oyida avtomobil ishlab chiqarish qanday bo‘ldi?

Davlat statistika qo‘mitasi O‘zbekistonning 2022-yil yanvar—iyun oylariga ko‘ra sanoat ishlab chiqarishi haqida ma’lumot berdi.

Yanvar—iyun oylariga ko‘ra O‘zbekistonda 160 100 dona yengil avtomobil ishlab chiqarilgan. Iyun oyida ishlab chiqarish ko‘rsatkichi 33 mingdan oshiq bo‘ldi.

Jumladan, yil boshidan beri 49,3 ming dona Cobalt ishlab chiqarilgan va o‘tgan yilining shu davriga nisbatan o‘sish 55,4 foiz bo‘lgan. 

Nexia ishlab chiqarish 9,7 foizga kamaygan va 12,5 ming dona bo‘lgan. 

Gentra o‘tgan yilning shu davriga nisbatan 2 barobar ko‘proq ishlab chiqarilmoqda. 2022-yilning yanvar—may oylariga ko‘ra 45 mingga yaqin bu turdagi yengi avtomobil ishlab chiqarilgan. 

May oyida 9,5 mingga yaqin Gentra va 10 mingga yaqin Cobalt ishlab chiqarilgan. 

Bundan tashqari yil boshidan beri 7,5 ming dona Spark (24 foizga oshgan), 9,8 mingta maxsus yengil avtomobillar (58,3 foizga oshgan) va 35,8 ming dona Damas (24,7 foizga oshgan) ishlab chiqarilgan.

Avvalroq O‘zbekiston Rossiyadan avtomobillar importini 3 barobarga kamaytirgani haqida xabar berilgandi.