Vazirlar Mahkamasining “Xalq ta’limi vazirligi tizimida o‘quvchi-yoshlarni kelajak kasblariga tayyorlash markazini tashkil etish chora-tadbirlari to‘g‘risida”gi qarori qabul qilindi. Bu haqda “Norma” xabar berdi.

Quyidagilar markazning asosiy vazifalari etib belgilandi:

• umumiy o‘rta ta’lim maktablari o‘quvchilari uchun kelajak kasblariga yo‘naltiruvchi to‘garaklar faoliyatini tashkil etish;
• o‘quvchi-yoshlarning bo‘sh vaqtlaridan unumli va maqsadli foydalanish, ularning ijodiy, intellektual va tadbirkorlik salohiyatini oshirish, zamonaviy fanlarni chuqur o‘rgatish uchun zarur shart-sharoitlar yaratish;
• o‘quvchi-yoshlarda mustaqil qaror qabul qilish ko‘nikmalarini, vatanparvarlik, milliy va umuminsoniy qadriyatlarni mustahkamlash, axborot makonidagi turli tahdidlarga nisbatan sog‘lom immunitetni hosil qilish;
• o‘quvchi-yoshlarning mustaqil tashabbus va shaxsiy g‘oyalarini ilgari surish, hayotiy pozitsiyaga ega bo‘lishini ta’minlashga yo‘naltirilgan mahorat darslarini hamda madaniy-ma’rifiy tadbirlarni tashkil etish.

Hujjat bilan belgilanishicha, markaz xodimlarining umumiy cheklangan soni 30 nafarni tashkil etadi.

Markazni moliyalashtirish manbalari quyidagilar hisoblanadi:

• davlat byudjetidan ajratiladigan mablag‘lar;
• yuridik va jismoniy shaxslarning homiylik xayriyalari;
• xalqaro moliya tashkilotlari va xorijiy davlatlarning grantlari;
• qonunchilik hujjatlari bilan taqiqlanmagan boshqa manbalar.

2022-yil 1 sentabrdan boshlab markaz direktori va to‘garak rahbarlarining mehnati ularning faoliyat samaradorligini baholash mezonlari asosida direktor jamg‘armasi hamda Xalq ta’limi vazirligi huzuridagi Xalq ta’limi sohasida islohotlarga ko‘maklashish jamg‘armasi mablag‘lari hisobidan har oyda qo‘shimcha rag‘batlantiriladi. Hujjat qonun hujjatlari ma’lumotlari milliy bazasida e’lon qilingan va 20-iyuldan kuchga kirdi.

Eslatib o‘tamiz, O‘zbekiston maktablarida o‘quvchilarni kasbga va oliy ta’limga tayyorlovchi yangi fan yo‘nalishlari joriy etilgan.