Iqtisodiy tadqiqotlar va islohotlar markazi iyun oyidagi ishbilarmonlik faoliyatini tahlil qildi. Bu haqda Markaz matbuot xizmati “Daryo”ga ma’lum qildi.
Hududlar kesimida Sirdaryo viloyatida eng yuqori o‘sish sur’ati qayd etilgan bo‘lsa, Surxondaryo viloyatida eng past o‘sish kuzatildi. Bundan tashqari banklararo to‘lov operatsiyalari soni 13 ta hududda oshdi.
Ishbilarmonlik faolligi indeksi (IFI) 2022-yil iyun oyida 1062 birlikni tashkil etib, may oyiga nisbatan 6,2 foizga oshgan.
Shuningdek, ishbilarmonlik faolligi indeksida o‘tgan yilning mos davriga nisbatan ham 51 foizlik o‘sish qayd etildi.
2022-yilning iyun oyida Ishbilarmonlik faolligi indeksi o‘tgan oyga nisbatan 6,2 foizga oshib, 1062 birlikni tashkil etishi, quyidagi komponentlar darajasidagi o‘zgarishlarga bog‘liq bo‘lgan:
- xo‘jalik yurituvchi subyektlarning bank hisobvaraqalaridagi operatsiyalar soni 14,4 foizga oshgan;
- faoliyat ko‘rsatayotgan xo‘jalik yurituvchi subyektlar bo‘yicha komponent 1,9 foizga kamaygan;
- tovar-xomashyo birjasida xomashyo sotib olish jadalligi 7,2 foizga oshgan;
- tovar belgilari bo‘yicha komponent 41,5 foizga kamaygan.
Hududlar kesimida Sirdaryo viloyatida yana bir marta eng yuqori o‘sish sur’ati qayd etilgan.
2022-yil iyun oyida Ishbilarmonlik faolligi indeksi barcha hududlarda o‘tgan oyga nisbatan o‘sish kuzatilgan.
Bank hisob varaqalari bo‘yicha operatsiyalar soni
2022-yil iyun oyida banklararo to‘lov operatsiyalari soni 5,7 milliontani tashkil etdi va 2022-yilning may oyiga nisbatan 716,1 ming tranzaksiyaga (14,4 foizga) oshgan.
Banklararo to‘lov operatsiyalari soni 13 ta hududda oshgan.
2022-yil iyunda O‘zbekistonning 13 ta hududida kompaniyalar o‘rtasidagi bank operatsiyalari soni o‘tgan oyga nisbatan oshgan.
Xususan, sezilarli darajadagi o‘sish Andijon (20,3 foiz), Farg‘ona (19,1 foiz), Navoiy (14,3 foiz) viloyatlari, Toshkent shahri (17, foiz) va Qoraqalpog‘iston Respublikasida (14,4 foiz) kuzatilgan. Ushbu ko‘rsatkich Surxondaryo viloyatida 7,1 foizga kamaygan.
Tovar xomashyo birjasidagi faollik
2022 yilning iyun oyida IFIning birja komponenti 1,0719 birlikni tashkil etdi. Bu esa ushbu komponentning o‘tgan oyga nisbatan 7,2 foizga oshganligini anglatib, har bir bitim bo‘yicha sotib olingan tovarlar o‘rtacha hajmi (7,1 foiz) hamda bitimlar sonining (7,3 foiz) oshganligi bilan izohlanadi.
O‘zbekiston tovar-xomashyo birjasida tovarlar savdosi umumiy aylanmasi hajmi 2022-yil iyun oyida 7,4 trln so‘mni tashkil etib, ushbu ko‘rsatkich o‘tgan oyga nisbatan 5 foizga oshgan.
Kompaniyalarning faolligi
Faoliyat yuritayotgan kompaniyalar bo‘yicha komponent 2022-yil iyun oyida 0,9808 birlikni tashkil etib, o‘tgan oyga nisbatan 1,9 foizga kamayganligini ko‘rsatadi.
Ushbu ko‘rsatkich o‘tgan yilning mos davriga nisbatan ijobiy o‘zgarib, 9,8 foizga oshgan.
2022-yil iyun oyida barcha turdagi faoliyat yuritayotgan kompaniyalar soni 2022-yilning may oyiga (598 986 birlik) nisbatan 6 382 taga ko‘payib, 605 371 birlikni tashkil etgan.
Yirik tadbirkorlik bilan shug‘ullanuvchi korxonalar soni 404 taga kamaygan.
Hisobot davrida, kichik korxonalar soni 487 101 tadan 493 727 tagacha oshgan (o‘sish 6 626 ta). Fermer xo‘jaliklari soni 107 918 tadan 108 078 tagacha (o‘sish 160 ta) oshgan.
Yirik tadbirkorlik bilan shug‘ullanayotgan kompaniyalar soni 3 566 tani tashkil etib, 2022 yilning may oyiga nisbatan 404 taga kamaygan.
Brendlarni ro‘yxatga olish
2022-yil iyun oyida savdo belgilari muhofazasi bo‘yicha biznes faolligi indeksi 0,5851 birlikni tashkil etib, ushbu ko‘rsatkich 2022-yilning may oyiga nisbatan 41,5 foizga sezilarli darajada kamaygan.
Joriy yilning iyun oyida kompaniyalar tomonidan 196 ta tovar belgilari va tovar nomlari ro‘yxatga olingan.
Izoh (0)