Иқтисодий тадқиқотлар ва ислоҳотлар маркази июнь ойидаги ишбилармонлик фаолиятини таҳлил қилди. Бу ҳақда Марказ матбуот хизмати «Дарё»га маълум қилди.
Ҳудудлар кесимида Сирдарё вилоятида энг юқори ўсиш суръати қайд этилган бўлса, Сурхондарё вилоятида энг паст ўсиш кузатилди. Бундан ташқари банклараро тўлов операциялари сони 13 та ҳудудда ошди.
Ишбилармонлик фаоллиги индекси (ИФИ) 2022 йил июнь ойида 1062 бирликни ташкил этиб, май ойига нисбатан 6,2 фоизга ошган.
Шунингдек, ишбилармонлик фаоллиги индексида ўтган йилнинг мос даврига нисбатан ҳам 51 фоизлик ўсиш қайд этилди.
2022 йилнинг июнь ойида Ишбилармонлик фаоллиги индекси ўтган ойга нисбатан 6,2 фоизга ошиб, 1062 бирликни ташкил этиши, қуйидаги компонентлар даражасидаги ўзгаришларга боғлиқ бўлган:
- хўжалик юритувчи субъектларнинг банк ҳисобварақаларидаги операциялар сони 14,4 фоизга ошган;
- фаолият кўрсатаётган хўжалик юритувчи субъектлар бўйича компонент 1,9 фоизга камайган;
- товар-хом ашё биржасида хом ашё сотиб олиш жадаллиги 7,2 фоизга ошган;
- товар белгилари бўйича компонент 41,5 фоизга камайган.
Ҳудудлар кесимида Сирдарё вилоятида яна бир марта энг юқори ўсиш суръати қайд этилган.
2022 йил июнь ойида Ишбилармонлик фаоллиги индекси барча ҳудудларда ўтган ойга нисбатан ўсиш кузатилган.
Банк ҳисоб варақалари бўйича операциялар сони
2022 йил июнь ойида банклараро тўлов операциялари сони 5,7 миллионтани ташкил этди ва 2022 йилнинг май ойига нисбатан 716,1 минг транзакцияга (14,4 фоизга) ошган.
Банклараро тўлов операциялари сони 13 та ҳудудда ошган.
2022 йил июнда Ўзбекистоннинг 13 та ҳудудида компаниялар ўртасидаги банк операциялари сони ўтган ойга нисбатан ошган.
Хусусан, сезиларли даражадаги ўсиш Андижон (20,3 фоиз), Фарғона (19,1 фоиз), Навоий (14,3 фоиз) вилоятлари, Тошкент шаҳри (17, фоиз) ва Қорақалпоғистон Республикасида (14,4 фоиз) кузатилган. Ушбу кўрсаткич Сурхондарё вилоятида 7,1 фоизга камайган.
Товар хом ашё биржасидаги фаоллик
2022 йилнинг июнь ойида ИФИнинг биржа компоненти 1,0719 бирликни ташкил этди. Бу эса ушбу компонентнинг ўтган ойга нисбатан 7,2 фоизга ошганлигини англатиб, ҳар бир битим бўйича сотиб олинган товарлар ўртача ҳажми (7,1 фоиз) ҳамда битимлар сонининг (7,3 фоиз) ошганлиги билан изоҳланади.
Ўзбекистон товар-хом ашё биржасида товарлар савдоси умумий айланмаси ҳажми 2022 йил июнь ойида 7,4 трлн сўмни ташкил этиб, ушбу кўрсаткич ўтган ойга нисбатан 5 фоизга ошган.
Компанияларнинг фаоллиги
Фаолият юритаётган компаниялар бўйича компонент 2022 йил июнь ойида 0,9808 бирликни ташкил этиб, ўтган ойга нисбатан 1,9 фоизга камайганлигини кўрсатади.
Ушбу кўрсаткич ўтган йилнинг мос даврига нисбатан ижобий ўзгариб, 9,8 фоизга ошган.
2022 йил июнь ойида барча турдаги фаолият юритаётган компаниялар сони 2022 йилнинг май ойига (598 986 бирлик) нисбатан 6 382 тага кўпайиб, 605 371 бирликни ташкил этган.
Йирик тадбиркорлик билан шуғулланувчи корхоналар сони 404 тага камайган.
Ҳисобот даврида, кичик корхоналар сони 487 101 тадан 493 727 тагача ошган (ўсиш 6 626 та). Фермер хўжаликлари сони 107 918 тадан 108 078 тагача (ўсиш 160 та) ошган.
Йирик тадбиркорлик билан шуғулланаётган компаниялар сони 3 566 тани ташкил этиб, 2022 йилнинг май ойига нисбатан 404 тага камайган.
Брендларни рўйхатга олиш
2022 йил июнь ойида савдо белгилари муҳофазаси бўйича бизнес фаоллиги индекси 0,5851 бирликни ташкил этиб, ушбу кўрсаткич 2022 йилнинг май ойига нисбатан 41,5 фоизга сезиларли даражада камайган.
Жорий йилнинг июнь ойида компаниялар томонидан 196 та товар белгилари ва товар номлари рўйхатга олинган.
Изоҳ (0)