“Gazprom” Germaniya kompaniyalariga gaz ta’minoti bilan bog‘liq fors-major holati haqida ma’lum qildi

“Gazprom” Yevropaning ikki yirik mijozini gaz yetkazib berish bilan bog‘liq fors-major holatlari haqida xabardor qildi. Bu haqda Reuters “Gazprom” maktubiga tayanib xabar bermoqda. 

Agentlik ma’lumotlariga ko‘ra, bular Germaniyaning Uniper va RWE kompaniyalari. 

Bloomberg shuningdek, “Gazprom” bir nechta yevropalik gaz xaridorlariga fors-major holatlarini e’lon qilganini, biroq aynan kimga aniqlik kiritmaganini yozadi.

Fors-major – bu tomonlarning faoliyatiga bog‘liq bo‘lmagan ijtimoiy-iqtisodiy holatlar sababli yuzaga kelgan, tashqi savdo va shartnomalar bo‘yicha tomonlarga qabul qilingan majburiyatlarni bajarish imkonini bermaydigan favqulodda, oldini olib bo‘lmaydigan va kutilmagan holatdir.

“Gazprom” o‘z nazorati ostida bo‘lmagan favqulodda vaziyatlar sabab yetkazib berish bo‘yicha majburiyatlarni bajarolmasligini tushuntirgan. 

Reuters manbasining aytishicha, gap “Shimoliy oqim” quvurlari orqali gaz yetkazib berish haqida ketmoqda. 

Uniper buni asossiz deb hisoblaydi va fors-major holatlari da’vosini rasman rad etadi, — dedi kompaniya Reuters agentligiga. 

RWE xabarnomaning mazmuni, uning tafsilotlari va unga munosabati haqida izoh berishdan bosh tortdi.

16-iyun kuni “Gazprom” “Shimoliy oqim” orqali gaz yetkazib berishni 40 foizgacha qisqartirdi.  Buni kompaniya Kanadadan gaz quvuri uchun uskunalar yetkazib berishning kechikishini sabab deb atadi. 

Endilikda gaz quvuri ta’mirlanishi munosabati bilan 21-iyulgacha yetkazib berish to‘xtatildi.

Germaniya rasmiylarining fikricha, Rossiya “Shimoliy oqim” orqali yetkazib berishni to‘liq tiklamaydi. 

Germaniya Federal tarmoq agentligi rahbari Klaus Myuller Rossiyadan ta’minot bo‘lmasa, Germaniya qishdan omon qolish qiyin bo‘lishini, biroq mamlakat yoqilg‘isiz qolmasligini ma’lum qildi.

Uniper va RWE Rossiya gazining Yevropadagi eng yirik importchilari hisoblanadi. Yaqinda Uniper Germaniya hukumatidan gaz inqirozi sharoitida biznesni barqarorlashtirishda yordam so‘radi. 

Rossiya gazining 60 foizga qisqarishi tufayli Uniper jiddiy moliyaviy bosim ostida qoldi, chunki u muqobil yetkazib beruvchilardan yoqilg‘ini “Gazprom”nikidan yuqori narxlarda sotib olishga majbur bo‘ldi.