Тошкент биринчи, Сирдарё охирги: Ўзбекистонда энг кўп чакана савдо амалга оширилган ҳудудлар маълум қилинди

Давлат статистика қўмитаси 2022 йил январь—июнь ойлари бўйича чакана савдо айланмасини эълон қилди.

Республика бўйича чакана савдо айланмаси 134,1 трлн сўмни ташкил этди. Бу 2021 йилнинг январь—июнь ойларига нисбатан 9,9 фоизга кўп.

Барча ҳудудларда ўсиш суръатлари кузатилди. Таркибий қисмлари 77,3 фоиз кичик бизнес ва хусусий тадбиркорлик субъектлари ва 22,7 фоиз йирик корхоналар ҳиссасига тўғри келди.

Товар айланмасида энг юқори улуш Тошкент шаҳрида — 25,5 фоиз, яъни 34,2 трлн сўм.

Кейинги ўринларда Тошкент (13,6 трлн сўм), Самарқанд (11,09 трлн сўм) ва Фарғона (10,7 трлн сўм) вилоятлари жойлашган.

Республика чакана савдо товар айланмасида энг қуйи улушни Сирдарё вилояти 1,5 фоиз билан 2,04 трлн сўмни ташкил этди.

Йирик корхоналарнинг товар айланмаси ҳажми, 2021 йилнинг январь—июнь ойларига нисбатан 30,9 фоизга ўсди. Бу 30,4 трлн сўмга тенг.

Бу эса умумий савдо ҳажмининг 22,7 фоиз улушига тўғри келди.

Кичик бизнес ва хусусий тадбиркорлик субъектларининг чакана савдо товар айланмаси ҳажми 103,7 трлн сўмни ташкил этиб, 2021 йилнинг январь—июнь ойларига нисбатан 5 фоизга кўпайди.

Республика миқёсида ушбу секторнинг жами улуши 77,3 фоизни ташкил этди.

Кичик бизнес ва хусусий тадбиркорлик субъектларининг улуши бўйича Сурхондарё (92,1 фоиз), Сирдарё (91,7 фоиз), Наманган (91 фоиз) вилоятлари етакчилик қилмоқда.

Йирик корхоналарнинг улуши 22,7 фоизни ташкил этиб, энг катта улуш Тошкент шаҳрида (39,3 фоиз), Тошкент (30,3 фоиз), Хоразм (22,5 фоиз) ва Самарқанд (21,8 фоиз) вилоятларида кузатилди.

2022 йилнинг январь—апрель ойлари ҳолатига кўра, ўртача аҳоли жон бошига чакана савдо товар айланмаси 3,7 млн сўмни ташкил этди. Бу кўрсаткич 2021 йилнинг мос даврига нисбатан 7,7 фоизга ошган.