Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, davlat tadbirkorlikni rivojlantirish uchun qulay ishbilarmonlik va investitsiyaviy muhitni, shart-sharoitlarni ta’minlashi Konstitutsiyada belgilab qo‘yilmoqda.
“Tadbirkorlar qonunchilikda taqiqlanmagan har qanday faoliyatni amalga oshirishga, o‘z faoliyatining yo‘nalishini mustaqil ravishda tanlashga, tadbirkorlikdan cheklanmagan miqdorda daromad olishga haqli”, deyiladi 53-moddaga kiritilayotgan o‘zgartirishda.
Prezident Shavkat Mirziyoyev joriy yil 20-iyun kuni Konstitutsiyaviy komissiya a’zolari bilan o‘tkazilgan uchrashuvdagi ma’ruzasida: “Tadbirkorlar qonunchilikda taqiqlanmagan har qanday faoliyatni amalga oshirishga, o‘z faoliyati yo‘nalishlarini mustaqil ravishda tanlashga, tadbirkorlikdan cheklanmagan miqdorda daromad olishga haqli ekanini Konstitutsiyada mustahkamlashni taklif etaman.
Davlat xususiy tadbirkorlikni rivojlantirish uchun qulay ishbilarmonlik va investitsiyaviy muhit hamda sharoitlarni ta’minlashi, erkin va halol raqobatning himoya qilinishi, iqtisodiy faoliyatda monopollashtirishga yo‘l qo‘yilmasligini kafolatlashi lozim”, - deya ta’kidlab, mazkur yo‘nalishdagi konstitutsiyaviy islohotlarning asosiy yo‘nalishlarini belgilab bergandi.
2022-2026-yillarga mo‘ljallangan Yangi O‘zbekistonning Taraqqiyot strategiyasining 21-maqsadida yalpi ichki mahsulotni 1,6 baravar va 2030-yilga borib aholi jon boshiga to‘g‘ri keladigan daromadni 4 ming AQSH dollaridan oshirish hamda “daromadi o‘rtachadan yuqori bo‘lgan davlatlar” qatoriga kirish bo‘yicha belgilangan vazifalarga faqat barqaror iqtisodiy o‘sish sur’atlarini ta’minlash va tadbirkorlik muhitini yaxshilash orqali erishiladi.
Shu nuqtai nazardan, konstitutsiyaga kiritilayotgan mazkur qo‘shimchalar erkin bozor iqtisodiyotini tavsiflovchi eng muhim prinsiplarni o‘zida ifoda etib, davlatni tadbirkorlik faoliyatini samarali tashkil etishga doir asosiy vazifalarini belgilaydi hamda “qonunda taqiqlanmagan har qanday faoliyatga ruxsat beriladi” prinsipi asosida tadbirkorlik faoliyatini davlat tomonidan tartibga solishni asosiy mezonlarini konstitutsiyaviy darajada mustahkamlaydi.
Shuningdek, kiritilayotgan mazkur normalar O‘zbekistonda qulay ishbilarmonlik va investitsion muhitning shakllanishida, xususiy sektorning ulushini oshirishga, yangi ish o‘rinlarining yaratilishiga, aholi daromadlarining oshishi va kambag‘allikni qisqartirishga xizmat qiladi.
Izoh (0)