O‘zbekiston hududida, shu jumladan, Toshkent shahrida kuzatilayotgan anomal issiq ob-havo sababli metropoliten poyezdlari faoliyatiga o‘zgartirish kiritiladi. Bu haqda “Toshkent metropoliteni” xabar qildi.
Qayd etilishicha, Toshkent shahrida havo haroratining keskin ko‘tarilishi sabab yerusti temiryo‘llari va ularning po‘lat qismlarining harorati juda yuqori bo‘lib, +70 darajaga yetishi mumkin. Temir yo‘llardan foydalanish qoidalariga ko‘ra, relslarning harorati +55 darajadan oshganda, poyezdlar harakati tezligi pasaytirilishi kerak. Ya’ni, qoidalarda relslarning harorati +60 daraja bo‘lganda, poyezdlar harakati tezligi 40 km/soatdan, +65 darajada 25 km/soatdan oshmasligi, +70 darajada esa poyezdlar harakati taqiqlanishi belgilangan.
“Yuqoridagilarni e’tiborga olib, poyezdlar harakati va yo‘lovchilarning xavfsizligini ta’minlash maqsadida metropolitenning Yer usti halqa yo‘li va Sergeli yo‘li uchastkalarida havo haroratining ko'tarilishi kuzatilgan vaqtlarda poyezdlar harakati tezligining vaqtincha cheklovi joriy etiladi”, — deyiladi xabarda.
Avvalroq O‘zbekistonda anomal issiq ob-havo sabab poyezdlar jadvaliga o‘zgartirish kiritilishi haqida xabar qilingandi. Eslatib o‘tamiz, issiq ob-havo ta’sirida yuz berayotgan bu amaliyot birinchi martasi emas. Iyun oyida ham ikki marta poyezdlar tezligi kamaytirilib, qatnov jadvaliga o‘zgartirish kiritilgan.
Izoh (0)