Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Унга кўра, давлат тадбиркорликни ривожлантириш учун қулай ишбилармонлик ва инвестициявий муҳитни, шарт-шароитларни таъминлаши Конституцияда белгилаб қўйилмоқда.
«Тадбиркорлар қонунчиликда тақиқланмаган ҳар қандай фаолиятни амалга оширишга, ўз фаолиятининг йўналишини мустақил равишда танлашга, тадбиркорликдан чекланмаган миқдорда даромад олишга ҳақли», дейилади 53-моддага киритилаётган ўзгартиришда.
Президент Шавкат Мирзиёев жорий йил 20 июнь куни Конституциявий комиссия аъзолари билан ўтказилган учрашувдаги маърузасида: «Тадбиркорлар қонунчиликда тақиқланмаган ҳар қандай фаолиятни амалга оширишга, ўз фаолияти йўналишларини мустақил равишда танлашга, тадбиркорликдан чекланмаган миқдорда даромад олишга ҳақли эканини Конституцияда мустаҳкамлашни таклиф этаман.
Давлат хусусий тадбиркорликни ривожлантириш учун қулай ишбилармонлик ва инвестициявий муҳит ҳамда шароитларни таъминлаши, эркин ва ҳалол рақобатнинг ҳимоя қилиниши, иқтисодий фаолиятда монополлаштиришга йўл қўйилмаслигини кафолатлаши лозим», - дея таъкидлаб, мазкур йўналишдаги конституциявий ислоҳотларнинг асосий йўналишларини белгилаб берганди.
2022-2026 йилларга мўлжалланган Янги Ўзбекистоннинг Тараққиёт стратегиясининг 21-мақсадида ялпи ички маҳсулотни 1,6 баравар ва 2030 йилга бориб аҳоли жон бошига тўғри келадиган даромадни 4 минг АҚШ долларидан ошириш ҳамда «даромади ўртачадан юқори бўлган давлатлар» қаторига кириш бўйича белгиланган вазифаларга фақат барқарор иқтисодий ўсиш суръатларини таъминлаш ва тадбиркорлик муҳитини яхшилаш орқали эришилади.
Шу нуқтаи назардан, конституцияга киритилаётган мазкур қўшимчалар эркин бозор иқтисодиётини тавсифловчи энг муҳим принципларни ўзида ифода этиб, давлатни тадбиркорлик фаолиятини самарали ташкил этишга доир асосий вазифаларини белгилайди ҳамда «қонунда тақиқланмаган ҳар қандай фаолиятга рухсат берилади» принципи асосида тадбиркорлик фаолиятини давлат томонидан тартибга солишни асосий мезонларини конституциявий даражада мустаҳкамлайди.
Шунингдек, киритилаётган мазкур нормалар Ўзбекистонда қулай ишбилармонлик ва инвестицион муҳитнинг шаклланишида, хусусий секторнинг улушини оширишга, янги иш ўринларининг яратилишига, аҳоли даромадларининг ошиши ва камбағалликни қисқартиришга хизмат қилади.
Изоҳ (0)