Qashqadaryo viloyati Kitob tumanida 18-iyul shifoxonada qo‘shnilar o‘rtasida ommaviy mushtlashuv bo‘lgani va ikki kishi pichoqlangani haqida xabar qilingandi. Viloyat Sog‘liqni saqlash boshqarmasi janjal oqibatlari haqida ma’lumot berildi.
Qayd etilishicha, shu kuni soat 12:48 da Kitob tumani “Samarqand” MFY hududida yashovchi fuqaro T.O. (2004-yilda tug‘ilgan) turli jarohatlar bilan tuman tibbiyot birlashmasi qabul-diagnostika bo‘limiga olib kelingan. Bemor zudlik bilan mutaxassislar tomonidan tegishli tekshiruvlardan o‘tkazilib, unga birinchi yordam ko‘rsatilgan va shoshilinch tez tibbiy yordam bo‘limiga yotqizilgan. Shu bemor bilan birga tibbiyot birlashmasining travmatologiya bo‘limiga “Samarqand” MFY hududida yashovchi Q.R. (1955-yilda tug‘ilgan) ham jarohat olgani sababli yotqizilgan.
Ushbu voqealardan biroz vaqt o‘tib, tuman tibbiyot birlashmasi hovlisida bemor T.O. dan xabar olishga kelgan qarindoshlari hamda bemorga jarohat yetkazganlikda gumonlanayotgan kishilar o‘rtasida janjal yuzaga kelgan. Janjal oqibatida yana bir guruh fuqarolar jarohatlangan. Jumladan, “Samarqand” MFY hududida yashovchi Q.I. (1979-yilda tug‘ilgan) va shu mahallada yashovchi A.A. (1978-yilda tug‘ilgan) sanchib kesilgan turli jarohatlar bilan shifoxonaga yotqizilgan.
Fuqarolar o‘rtasidagi janjal shu yerda hozir bo‘lgan ichki ishlar xodimlari tomonidan to‘xtatilgan. Jarohatlangan fuqarolarga zudlik bilan tegishli tibbiy yordamlar ko‘rsatilgan. Ayni paytda yuqorida qayd etilgan 4 nafar bemorning ahvoli qoniqarli, davolash jarayonlari davom ettirilmoqda.
Hodisa oqibatida tuman tibbiyot birlashmasida davolanayotgan boshqa bemorlar, bu yerda faoliyat ko‘rsatayotgan tibbiyot xodimlari va voqeaga guvoh bo‘lgan boshqa fuqarolarga shikast yetmagan.
Holat bo‘yicha huquqni muhofaza qilish idoralari tomonidan tergov harakatlari olib borilmoqda.
Izoh (0)