Yevroittifoq tomonidan Rossiyaga qarshi joriy etilgan sanksiyalar urushni qo‘llab-quvvatlayotgan Belarusdan tashqari uchinchi dunyo mamlakatlariga yo‘naltirilmagan. Bu haqda Yevroittifoq rasmiy vakili Lyuk Devin Toshkent shahriga tashrifi chog‘ida aytib o‘tdi, deya xabar bermoqda “Daryo” muxbiri.
Yevropaning tashqi harakatlar xizmatini Sharqiy hamkorlik, Rossiya, Kavkaz va Markaziy Osiyo bo‘yicha boshqaruvchi direktori o‘rinbosari Lyuk Devin boshchiligidagi delegatsiya 14—15-iyul kunlari Toshkentda bo‘lib, bir qator uchrashuvlar o‘tkazdi. Muloqot mavzusi 17-18-noyabr kunlari Samarqandda bo‘lib o‘tadigan “Yevropa Ittifoqi — Markaziy Osiyo” anjumani va vazirlar darajasidagi uchrashuvga tayyorgarlik ko‘rish masalasida bo‘ldi.
Lyuk Devinning aytishicha, Yevroittifoq Rossiyaga qarshi joriy etgan sanksiyalar Belarusdan boshqa uchinchi dunyo mamlakatlariga yo‘naltirilmagan.
“Rossiya tomondan Ukrainaga nisbatan qilinayotgan agressiyaga to‘laligicha qarshi ekanligimizni eslatib o‘tishimizga ijozat bersangiz. Biz buni noqonuniy bosqin deb hisoblaymiz. Shuning uchun Rossiyaga qarshi sanksiyalar joriy qildik. Bu sanksiyalar global ahamiyatga ega emas va bu urushni qo‘llab-quvvatlayotgan Belarusdan tashqari uchinchi dunyo mamlakatlariga yo‘naltirilmagan. Biz buning boshqa davlatlarga zarar yetkazishini istamaymiz. Bunga aniqlik kiritish uchun Markaziy Osiyo davlatlari elchixonalari vakillari bilan ikkita uchrashuv o‘tkazdik va ularga sanksiyalardan nima ko‘zlanganini tushuntirdik. Xususiy sektordagi faol shaxslarning harakatlarini nazorat qila olmaymiz. Shuningdek, energiya tashuvchi va oziq-ovqatga bo‘lgan narxlarning oshishiga ham bizning sanksiyalarimizning ta’siri yo‘q. Bu Rossiya Ukrainaning oziq-ovqat transporti bilan shug‘ullanadigan portlarini yopib qo‘ygani bilan bog‘liq. Biz bundan hech qanaqasiga manfaatdor emasmiz” – dedi Yevroittifoq rasmiysi.
Avvalroq Lyuk Devin O‘zbekistonning Jahon savdo tashkilotiga qo‘shilish jarayoni tez orada yakunlanishiga umid bildirgandi.
Izoh (0)