Qashqadaryoning sobiq hokimi Ozod Parmonov prezident e’tirofiga sazovor bo‘ldi

Qashqadaryo viloyatining sobiq hokimi, 1995-yildan 1998-yilga qadar viloyatga rahbarlik qilgan Ozod Parmonov prezident e’tirofiga erishdi. Bu haqda qashqadaryolik bloger Husan Komiljonov ma’lum qildi.

Ma’lum qilinishicha, bugun, 18-iyul kuni viloyat hokimi Murodjon Azimov boshchiligida bir guruh nuroniylarni “Mehnat faxriysi” ko‘krak nishoni bilan taqdirlash marosimi bo‘lib o‘tgan.

Tadbirda 1995-yil 29-noyabrdan 1998-yil 3-iyunga qadar viloyatni boshqargan Ozod Parmonov “Mehnat faxriysi” ko‘krak nishoni bilan taqdirlangan.

“Bilasizmi, e’tirof etilgan, ayniqsa davlat rahbarining e’tirofiga erishgan inson ko‘pincha bu mening emas, jamoamning yutug‘i, mehnati samarasi deyishadi. Men shu ko‘krak nishonni olgan paytimda, nima desam bo‘larkan deb o‘ylab qoldim. Jamoamning mehnati samarasi desam, nega o‘tgan 20 yil davomida e’tirof etilmadik? Nega shuncha yil kutildi? Shuning uchun, men bu e’tirofni Yangi O‘zbekistonning yangi islohoti samarasi, prezident Shavkat Mirziyoyevning adolatli siyosati natijasi degan bo‘lardim. Va buning uchun prezidentimizga tashakkur izhor qilaman”, — deydi Ozod Parmonov “Daryo” muxbiri bilan muloqotda.

Ozod Parmonovning qo‘shimcha qilishicha, u viloyat hokimi sifatidagi faoliyati yakunlangach, 20 yil umuman eslanmagan, mehnati qadrlanmagan.

“Prezident Shavkat Mirziyoyev tomonidan to‘rt marta e’tirof etildim. Bugun olgan Mehnat faxriysi ko‘krak nishoni shu e’tiroflarning to‘rtinchisi bo‘ldi”, — deydi u.

Viloyat hokimligi axborot xizmati rahbari Ahror Sodiqovning “Daryo”ga qo‘shimcha qilishicha, bugun 64 nafar kishi shu e’tirofga munosib ko‘rilgan.

“Shundan ko‘krak nishonning birinchi darajalisi 34 ta bo‘lsa, ikkinchi darajalisi 30 tani tashkil qiladi”, — deydi Ahror Sodiqov.

Prezidentning “Mehnat faxriysi” ko‘krak nishonini ta’sis etish to‘g‘risidagi qarorida keltirilishicha, birinchi darajali ko‘krak nishoni bilan mukofotlangan shaxslar bazaviy hisoblash miqdorining to‘rt baravari miqdorida, ikkinchi darajali ko‘krak nishoni bilan mukofotlangan shaxslar bazaviy hisoblash miqdorining uch baravari miqdorida bir yo‘la to‘lanadigan pul mukofoti oladi. Shuningdek, ko‘krak nishoni bilan mukofotlangan shaxslar Sog‘liqni saqlash vazirligi tomonidan belgilanadigan tartibda tibbiy xizmatdan imtiyozli foydalanish huquqiga ega bo‘ladi.

Avvalroq Qashqadaryoning birinchi hokimi Temir Xidirov 77 yoshida vafot etgani xabar berilgandi.