O‘zbekistondagi gaz quyish shoxobchalarida 15-iyuldan boshlab metan narxi oshgani haqida xabarlar tarqalgandi. Monopoliyaga qarshi kurashish qo‘mitasi holat yuzasidan o‘tkazilgan tezkor o‘rganish ishlari natijalarini e’lon qildi.
O‘rganish natijalari bo‘yicha Qoraqalpog‘iston Respublikasi, viloyatlar va Toshkent shahrida joylashgan avtomobillarga gaz quyish shoxobchalari tomonidan bugungi kunda 1 kub metr metan gazining narxi barqaror ravishda o‘rtacha 2300 so‘mdan 2800 so‘mgacha sotilayotgani aniqlangan.
Qo‘mita xabarida ta’kidlanishicha, metan gaz narxlari doimiy monitoring qilib borilmoqda va avtomobillarga gaz quyish shoxobchalari metan gazi narxlarini sun’iy ravishda oshirgan taqdirda belgilangan tartibda tegishli chora ko‘riladi.
Vazirlar Mahkamasining 14-iyuldagi qaroriga muvofiq yuridik shaxslar uchun tabiiy gaz va elektroenergiya uchun tariflar oshirilishi vaqtinchalik to‘xtatilgandi. Shunga qaramay, ayrim gaz quyish shoxobchalarida 15-iyuldan boshlab metan narxi oshirilgani haqida xabarlar tarqaldi. Energetika vazirligi holatga munosabat bildirib, hukumat qaroriga ko‘ra, gaz quyish shoxobchalari uchun mahsulotlarni sotish narxlari oshmagani va bir xil darajada saqlanib qolganini metan narxini oshirishning obyektiv sabablari yo‘qligini ma’lum qildi.
Shu bilan birga, vazirlik va boshqa davlat tashkilotlari avtomobillarga gaz to‘ldirish kompressor shoxobchalarning narx siyosatiga ta’sir ko‘rsatish imkoniyatiga ega emasligi, chunki ular bozor sharoitida faoliyat yuritadi va talab va taklifga qarab narxlarni o‘zlari shakllantirishini bildirib o‘tdi.
Izoh (0)