Ўзбекистондаги газ қуйиш шохобчаларида 15 июлдан бошлаб метан нархи ошгани ҳақида хабарлар тарқалганди. Монополияга қарши курашиш қўмитаси ҳолат юзасидан ўтказилган тезкор ўрганиш ишлари натижаларини эълон қилди.
Ўрганиш натижалари бўйича Қорақалпоғистон Республикаси, вилоятлар ва Тошкент шаҳрида жойлашган автомобилларга газ қуйиш шохобчалари томонидан бугунги кунда 1 куб метр метан газининг нархи барқарор равишда ўртача 2300 сўмдан 2800 сўмгача сотилаётгани аниқланган.
Қўмита хабарида таъкидланишича, метан газ нархлари доимий мониторинг қилиб борилмоқда ва автомобилларга газ қуйиш шохобчалари метан гази нархларини сунъий равишда оширган тақдирда белгиланган тартибда тегишли чора кўрилади.
Вазирлар Маҳкамасининг 14 июлдаги қарорига мувофиқ юридик шахслар учун табиий газ ва электроэнергия учун тарифлар оширилиши вақтинчалик тўхтатилганди. Шунга қарамай, айрим газ қуйиш шохобчаларида 15 июлдан бошлаб метан нархи оширилгани ҳақида хабарлар тарқалди. Энергетика вазирлиги ҳолатга муносабат билдириб, ҳукумат қарорига кўра, газ қуйиш шохобчалари учун маҳсулотларни сотиш нархлари ошмагани ва бир хил даражада сақланиб қолганини метан нархини оширишнинг объектив сабаблари йўқлигини маълум қилди.
Шу билан бирга, вазирлик ва бошқа давлат ташкилотлари автомобилларга газ тўлдириш компрессор шохобчаларнинг нарх сиёсатига таъсир кўрсатиш имкониятига эга эмаслиги, чунки улар бозор шароитида фаолият юритади ва талаб ва таклифга қараб нархларни ўзлари шакллантиришини билдириб ўтди.
Изоҳ (0)