Joriy yilning 13-iyul kuni Buyuk Britaniyaning London shahrida xalqaro yetakchi nashr — Euromoney tahririyatining Euromoney Awards for Excellence versiyasi bo‘yicha dunyodagi eng ilg‘or banklarni taqdirlash marosimi bo‘lib o‘tdi. Unda “O‘zsanoatqurilishbank” “2022-yilda O‘zbekistondagi eng ilg‘or bank” nominatsiyasi bo‘yicha g‘olib deb topildi.
Nashr ekspertlari bankni O‘zbekistonning eng yirik kredit muassasasi sifatida e’tirof etib, uning so‘nggi 12 oy davomidagi faoliyatini tahlil qilishdi. Hisobot davrida muassasaning moliyaviy ko‘rsatkichlari yaxshilangani ta’kidlandi.
Xususan, O‘zbekiston Respublikasi Markaziy banki ma’lumotlariga ko‘ra, 2022-yilning 1-yanvar holatiga ko‘ra, bank tomonidan ajratilgan kreditlar umumiy hajmi mamlakat kredit bozorining 13,2 foizini, umumiy aktivlari qiymati bank sektori umumiy aktivlari qiymatiga nisbatan 12,7 foizni tashkil etganligi, depozit qiymati sohadagi umumiy depozitlar qiymatiga nisbatan 8,1 foiz ekvivalentiga teng bo‘lganligi, shuningdek, umumiy daromadi o‘tgan yilga nisbatan 125 foizga o‘sganligi qayd etildi.
Tahlilchilar “O‘zsanoatqurilishbank” tizimida Xalqaro moliya korporatsiyasi (XMK) hamda Yevropa tiklanish va taraqqiyot banki (YETTB) bilan hamkorlikda amalga oshirilayotgan transformatsiya ishlariga yuqori baho berdi.
Ushbu o‘zgarishlar bankka biznes ko‘lamini kengaytirish va uni bozor tamoyillarida faoliyat yurituvchi universal moliya muassasaga aylantirish, investitsiyaviy portfelini kichik biznes va uning chakana segmentlariga urg‘u bergan holda diversifikatsiyalash, marketing va brend jihatdan jamoatchilik o‘rtasidagi mavqeini yanada oshirishga xizmat qilayotganini e’tirof etdi.
“Yashil bank”ni rivojlantirish borasida xalqaro moliyaviy institutlar bilan olib borayotgan keng ko‘lamli ishlari alohida qayd etildi. 2021-yilda bank tomonidan korporativ va chakana mijozlar hamda kichik va o‘rta biznes subyektlari uchun umumiy qiymati 107,6 million AQSh dollari miqdorida “yashil kredit”lar ajratdi. Istiqbolda bank tomonidan “yashil kredit”lar portfelini 350 million dollar yoki bankning umumiy kreditlar portfeliga nisbatan qariyb 8,7 foizgacha kengaytirish bo‘yicha katta vazifalar belgilangan.
Shuningdek, Euromoney nashriyoti bankning yaqin kelajakka belgilagan maqsadlari sifatida XMK, YeTTB va Osiyo taraqqiyot banki kabi yirik xalqaro moliya institutlari ishtirokida xususiylashtirish jarayonlarini muddatidan oldin tugatishini ham ijobiy baholadi.
Mazkur xalqaro moliya institutlarining moliyaviy mablag‘larini bank aksiyadorlik kapitaliga konvertatsiya qilish imkoniyati bilan jalb qilishini ta’kidladi.
Ma’lumot uchun
Euromoney Awards for Excellence marosimi 1992-yildan boshlab har yili xalqaro nufuzli moliyaviy nashr — Euromoney jurnali tomonidan dunyoning 100 mamlakatlaridagi eng sara banklar o‘rtasida o‘tkaziladi. Mukofot banklarga taqdim etiladigan sovrinlar orasida o‘ziga xos oltin standart maqomiga ega bo‘lib, g‘oliblar tahririyat hay’ati tomonidan ko‘p oylik tadqiqotlar va so‘rovnomalar asosida aniqlanadi. Joriy yilda nashriyot butun dunyodagi banklarni turli yo‘nalishlar bo‘yicha mukofotlash uchun eng ko‘p miqdorda — 1300 ta ariza qabul qildi.
Reklama huquqi asosida.
Izoh (0)