DXXning Qashqadaryo viloyati bo‘yicha boshqarmasi xodimlari tomonidan viloyat IIB bilan hamkorlikda terrorizm va ekstremizmga qarshi kurashish doirasida o‘tkazilgan tezkor tadbirlarda “Jihodchilar” oqimi g‘oyalarini targ‘ib qilgan shaxslar qo‘lga olindi.
Xususan, Kitob tumanida yashovchi, Q.T. (1998-yilda tug‘ilgan) 2020—2021-yillar davomida Rossiyada ishlashi davrida ijtimoiy tarmoqlar orqali “Jihodchilar” diniy ekstremistik oqimi a’zolari ta’siriga tushib, ularni qo‘llab-quvvatlab kelgan. Doimiy yashash manziliga qaytib kelganidan keyin esa o‘z atrofidagilarga ushbu oqim g‘oyalarini targ‘ib qilish bilan shug‘ullangan.
Shuningdek, internet orqali Suriyadagi jangarilar bilan aloqa o‘rnatib, ularning yo‘l-yo‘riqlari hamda ko‘rsatmalari asosida Rossiya—Turkiya yo‘nalishi orqali ularning safiga borib qo‘shilishni rejalashtirgani aniqlangan va oldi olingan.
Hozirda Q.T.ga nisbatan qo‘zg‘atilgan jinoyat ishi doirasida uning aloqalarini aniqlash bo‘yicha tegishli chora-tadbirlar amalga oshirilmoqda.
Qarshi tumanida yashovchi R.S. (1985-yilda tug‘ilgan) 2021-yilda Saudiya Arabistonida ishlashi davrida “Jihodchilar” a’zolari ta’siriga tushgan hamda ular bilan aloqa o‘rnatib, oqim g‘oyalarini qo‘llab-quvvatlagan. Yashash manziliga qaytganidan keyin ham o‘z yaqinlari orasida hamda ijtimoiy tarmoqlar orqali ularning g‘oyalari targ‘iboti bilan shug‘ullangan.
Hozirda R.S.ga nisbatan Jinoyat kodeksining 244-1-moddasi bilan jinoyat ishi qo‘zg‘atilib, insonparvarlik tamoyili asosida “tilxat” ehtiyot chorasi qo‘llanilgan.
Qarshi shahrida yashovchi J.M. (1993-yilda tug‘ilgan) ijtimoiy tarmoqlar orqali “Jihodchilar” a’zolari ta’siriga tushib, Telegram’da guruh va kanal tashkil qilgan hamda ular orqali ekstremistik g‘oyalarni targ‘ib qilgan.
Jinoyat ishlari bo‘yicha Qarshi shahar sudi hukmiga ko‘ra, yolg‘iz onaligi va 9 oylik farzandi borligi hisobga olinib, unga nisbatan 3 yil muddatga ozodlikni cheklash jazosi tayinlandi.
Izoh (0)