O‘zbekistondagi AYQSHlarda o‘tkazilgan nazorat tadbirlari davomida 108 ming litr neft mahsulotlari bilan bog‘liq qonun buzilish holatlari aniqlandi. Bu haqda Energetika vazirligi xabar qildi.
Qayd etilishicha, iste’molchilarga yetkazib berilayotgan neft mahsulotlarini sifat va miqdor jihatidan amaldagi me’yoriy hujjatlar talablariga muvofiqligi bo‘yicha Energetika vazirligi huzuridagi “O‘zneftgazinspeksiya” tomonidan joriy yilning iyun—iyul oylarida navbatdagi nazorat tadbirlari o‘tkazilgan.
Nazorat tadbirlari davomida neft mahsulotlarini sotish bilan shug‘ullanuvchi 44 ta xususiy korxonalarga qarashli AYQSHlarda umumiy miqdori 108 ming litr neft mahsulotlari bilan bog‘liq qonun buzilish holatlari aniqlangan. Jumladan:
- AYQSHlarda saqlanayotgan neft mahsulotlaridan namunalar olinib, laboratoriya sharoitida tahlil etilganida 34 ming litr mahsulot sifatsiz ekani;
- 60 ming litr kamomad, 15 ming litr ortiqchalik va 299 litr asossiz hisobdan chiqarish holatlariga yo‘l qo‘yilgani;
- 10 ta holatda iste’molchilar haqidan har 10 litrda 30 millilitrdan 750 millilitrgacha kam quyib berilayotgani;
- AYQSHlarda 70 ga yaqin texnik va metrologik kamchiliklarga yo‘l qo‘yilgani ma’lum bo‘lgan.
“Aniqlangan qonun buzilish holatlari bo‘yicha rasmiylashtirilgan hujjatlar chora ko‘rish uchun huquqni muhofaza qilish organlariga muntazam ravishda yuborilmoqda. Nazorat tadbirlari davom ettirilmoqda”, — deyiladi xabarda.
Mavzuga doir:
- “Urbanizatsiyani yo‘lga qo‘ysak, ko‘mirda uyini isituvchi xonadonlar soni ancha kamayadi” — Energetika vazirligi vakili
- Toshkent viloyatida 26 mingta xonadonning bir oylik iste’moliga teng bo‘lgan tabiiy gazdan noqonuniy foydalangan korxona aniqlandi
- O‘zbekistonda 1-iyuldan elektr va gaz narxi oshmaydi — Energetika vazirligi
Izoh (0)