ДХХнинг Қашқадарё вилояти бўйича бошқармаси ходимлари томонидан вилоят ИИБ билан ҳамкорликда терроризм ва экстремизмга қарши курашиш доирасида ўтказилган тезкор тадбирларда «Жиҳодчилар» оқими ғояларини тарғиб қилган шахслар қўлга олинди.
Хусусан, Китоб туманида яшовчи, Қ.Т. (1998 йилда туғилган) 2020—2021 йиллар давомида Россияда ишлаши даврида ижтимоий тармоқлар орқали «Жиҳодчилар» диний экстремистик оқими аъзолари таъсирига тушиб, уларни қўллаб-қувватлаб келган. Доимий яшаш манзилига қайтиб келганидан кейин эса ўз атрофидагиларга ушбу оқим ғояларини тарғиб қилиш билан шуғулланган.
Шунингдек, интернет орқали Суриядаги жангарилар билан алоқа ўрнатиб, уларнинг йўл-йўриқлари ҳамда кўрсатмалари асосида Россия—Туркия йўналиши орқали уларнинг сафига бориб қўшилишни режалаштиргани аниқланган ва олди олинган.
Ҳозирда Қ.Т.га нисбатан қўзғатилган жиноят иши доирасида унинг алоқаларини аниқлаш бўйича тегишли чора-тадбирлар амалга оширилмоқда.
Қарши туманида яшовчи Р.С. (1985 йилда туғилган) 2021 йилда Саудия Арабистонида ишлаши даврида «Жиҳодчилар» аъзолари таъсирига тушган ҳамда улар билан алоқа ўрнатиб, оқим ғояларини қўллаб-қувватлаган. Яшаш манзилига қайтганидан кейин ҳам ўз яқинлари орасида ҳамда ижтимоий тармоқлар орқали уларнинг ғоялари тарғиботи билан шуғулланган.
Ҳозирда Р.С.га нисбатан Жиноят кодексининг 244-1-моддаси билан жиноят иши қўзғатилиб, инсонпарварлик тамойили асосида «тилхат» эҳтиёт чораси қўлланилган.
Қарши шаҳрида яшовчи Ж.М. (1993 йилда туғилган) ижтимоий тармоқлар орқали «Жиҳодчилар» аъзолари таъсирига тушиб, Telegram’да гуруҳ ва канал ташкил қилган ҳамда улар орқали экстремистик ғояларни тарғиб қилган.
Жиноят ишлари бўйича Қарши шаҳар суди ҳукмига кўра, ёлғиз оналиги ва 9 ойлик фарзанди борлиги ҳисобга олиниб, унга нисбатан 3 йил муддатга озодликни чеклаш жазоси тайинланди.
Изоҳ (0)