Ko‘ksaroyda Serdar Berdimuhamedovni rasmiy kutib olish marosimi bo‘lib o‘tdi

Shavkat Mirziyoyev 14-iyul kuni “Ko‘ksaroy” qarorgohida Turkmaniston prezidenti Serdar Berdimuhamedovni kutib oldi. Bu haqda Prezident matbuot xizmati xabar qildi.

Qayd etilishicha, oliy martabali mehmonni rasmiy kutib olish marosimi bo‘lgan. Shavkat Mirziyoyev va Serdar Berdimuhamedov maxsus shohsupaga ko‘tarilgan. Ikki davlat madhiyalari yangragan.

Faxriy qorovul bo‘linmasi boshlig‘i raport bergach, davlat rahbarlari qorovul safi oldidan o‘tib, o‘zbek harbiy xizmatchilarini qutlagan va O‘zbekiston Respublikasi davlat bayrog‘iga ehtirom ko‘rsatgan.

So‘ng prezidentlar rasmiy delegatsiyalar a’zolarini bir-biriga tanishtirgan. Birgalikda suratga tushish marosimidan so‘ng davlat rahbarlari tor doirada muzokara o‘tkazish uchun mo‘ljallangan zalga o‘tgan.