Farg‘onada Damas haydovchisi quvib o‘tish qoidasini buzishi oqibatida ikki kishi halok bo‘ldi

Farg‘ona viloyati Farg‘ona tumanida ikki kishini o‘limi bilan yakunlangan YTH yuz berdi. Bu haqda YHXB matbuot xizmati xabar berdi.

Voqea 13-iyul kuni soat 18:15 larda, tuman hududidan o‘tgan 4R-146 Farg‘ona—Chimyon avtomobil yo‘lining 5-kilometrida yuz bergan. Haydovchi A.M. (2000-yilda tug‘ilgan) Damas’ni boshqarib borayotib, quvib o‘tish qoidasini buzib, qarama-qarshi yo‘nalishga o‘tib ketgan.

So‘ng boshqaruvni yo‘qotib ag‘darilib ketishi natijasida qarama-qarshi yo‘nalishda harakatlanib kelayotgan M.A (1964-yilda tug‘ilgan) boshqaruvidagi Lacetti bilan to‘qnashgan.

Oqibatda Damas’da bo‘lgan ikki nafar yo‘lovchi voqea joyida vafot etgan. Shuningdek, yana ikki nafar yo‘lovchi tan jarohati olib shifoxonaga yotqizilgan.

Bundan avval Farg‘onada qarama-qarshi yo‘nalishga chiqib harakatlangan Lacetti Matiz bilan to‘qnashishi oqibatida bir kishi halok bo‘lgani haqida xabar berilgan edi.