Andijon viloyati hokimligi “Daryo”da e’lon qilingan “Andijon hokimi prezident qarori ijrosini ta’minlash bo‘yicha qaror qabul qildi. Qarorida vazirlarga, Toshkent shahar hokimiga topshiriq berdi”, sarlavhali maqolaga munosabat bildirib, holatga izoh berdi.
“Andijon viloyati hokimining mazkur qarori O‘zbekiston Respublikasi ‘Normativ huquqiy hujjatlar to‘g‘risida’gi qonuni, O‘zbekiston Respublikasi Adliya vazirining 2021-yil 15-noyabrdagi buyrug‘i bilan tasdiqlangan mahalliy davlat hokimiyati organlari tomonidan normativ huquqiy hujjatlar loyihalarini ishlab chiqish, yuridik texnik jihatdan rasmiylashtirish va huquqiy ekspertizadan o‘tkazish qoidalariga asosan, belgilangan talablarga rioya qilingan holda ishlab chiqilgan.
Maqolada ta’kidlangan kamchilik qarorning ‘y’ kichik bandidan olingan bo‘lib, jumlaning oxiri, ya’ni ‘l’ kichik bandi o‘qilganda O‘zbekiston Respublikasi prezidentining qarorida berilgan topshiriqlarning barchasi ma’lumot va ijro uchun qabul qilingani ma’lum bo‘ladi.
Prezident qarori matni viloyat hokimining qarorida so‘zma-so‘z keltirilgani, viloyat hokimining qarori boshqa quyi tashkilotlarga yuborilishi munosabati bilan ularga O‘zbekiston Respublikasi prezidenti qarorining mazmunini to‘liq yetkazish maqsad qilingan”, — deyiladi hokimlik munosabatida.
Ma’lum qilinishicha, viloyat hokimi qarorining “g”, “y”, “l” kichik bandlarida ilovalar tasdiqlangani ko‘rsatilgan.
“Maqolada prezident qarorining 3-ilovasidagi ‘2022—2023-yillarda ommaviy axborot vositalarini qo‘llab-quvvatlash hamda jurnalistika sohasini yanada rivojlantirish chora-tadbirlari’ dasturi viloyatga moslashtirilmaganligi ta’kidlangan. Viloyat hokimi qarorining 7-bandida viloyat hokimining o‘rinbosarlari, mas’ul boshqarma va tashkilotlar, shahar va tumanlar hokimlariga mazkur qarordan kelib chiqib, o‘rnatilgan tartibda ish tashkil qilinishi va belgilangan vazifalar ijrosini o‘z vaqtida bajarilishini ta’minlashi to‘g‘risida topshiriq berilgan. Viloyat hokimining qarori mas’ul boshqarma va tashkilotlarga ham yuborilishi e’tiborga olinib, dastur to‘liq tushunarli bo‘lishi uchun dastur o‘zgartirishlarsiz hokim qaroriga ilova qilingan.
O‘zbekiston Respublikasining ‘Normativ huquqiy hujjatlar to‘g‘risida’gi qonunining 16-moddasida mahalliy davlat hokimiyati organlarining qarorlari O‘zbekiston Respublikasining Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari, qarorlari va farmoyishlari, O‘zbekiston Respublikasi Vazirlar Mahkamasining qarorlari va farmoyishlari, shuningdek, mahalliy davlat hokimiyati yuqori turuvchi organlarining qarorlari asosida hamda ularni ijro etish uchun qabul qilinishi belgilangan.
Adliya vazirining 2021-yil 15-noyabrdagi buyrug‘i bilan tasdiqlangan mahalliy davlat hokimiyati organlari tomonidan normativ huquqiy hujjatlar loyihalarini ishlab chiqish, yuridik texnik jihatdan rasmiylashtirish va huquqiy ekspertizadan o‘tkazish qoidalarining ‘v’ kichik bandida muqaddam belgilangan tartibni ijro etishni tashkil etishga yo‘naltirilgan hamda yangi huquqiy normalarni o‘z ichiga olmagan, shu jumladan, butun mazmuni boshqa organlar va mansabdor shaxslarning hujjatlari to‘g‘risida xabardor qilishdan iborat bo‘lgan hujjatlar hududiy adliya organlarida huquqiy ekspertizadan o‘tkazilmasligi ko‘rsatilgan”, — deyiladi Andijon viloyati hokimligi bergan rasmiy ma’lumotda.
Izoh (0)