“O‘zbekiston Respublikasining Soliq kodeksiga qo‘shimcha va o‘zgartishlar kiritish to‘g‘risida”gi qonun bilan maxsus iqtisodiy zonalarning ishtirokchilariga foyda solig‘i bo‘yicha imtiyoz berilishi kutlayotgani haqida xabar berilgan edi. Prezident 12-iyul kuni ushbu qonunni imzoladi.
Kiritilgan qo‘shimchalar bilan maxsus iqtisodiy zonalarning ishtirokchilariga foyda solig‘i bo‘yicha imtiyoz berish muddatlari belgilandi. Unga ko‘ra, imtiyoz muddati investitsiya hajmiga qarab:
- 3 million dollardan 5 million dollargacha investitsiya uchun — 3 yil;
- 5 million dollardan 15 million dollargacha investitsiya uchun — 5 yil;
- 15 million dollar va undan ko‘p investitsiyalar uchun — 10 yil muddatga foyda solig‘idan ozod qilinadi.
Eslatib o‘tamiz, ushbu qonun loyihasi 8-iyul kuni senatorlar tomonidan ma’qullangandi. Uni ishlab chiqishga prezidentning 2021-yil 14-sentabrdagi “Maxsus iqtisodiy zonalar ishtirokchilarini yanada qo‘llab-quvvatlash chora-tadbirlari to‘g‘risida”gi PQ-5243-son qaroridagi vazifalar va erkin iqtisodiy zonalarning 100 dan ortiq ishtirokchilari murojaatlari asos bo‘lgan.
Senat matbuot xizmati xabariga ko‘ra, ushbu qonun qabul qilinishi natijasida maxsus iqtisodiy zona ishtirokchilari o‘z ixtiyorida 47,9 milliard so‘m mablag‘lar iqtisod qiladi. Natijada korxonalarning yillik ishlab chiqarish hajmlari ortib, qo‘shimcha ish o‘rinlari tashkil etilishiga imkon yaratiladi.
Qonun rasmiy e’lon qilingan kundan e’tiboran kuchga kirdi.
Izoh (0)