Россияда маймунчечак вируси билан касалланишнинг биринчи ҳолати тасдиқланди. Бу ҳақда «Роспотребнадзор» (Россия Истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати)га таяниб, «Интерфакс» хабар берди.
Касаллик Европадан қайтган ҳамда танасида маймунчечакка хос тошмалар билан касалхонага борган ёш йигитда аниқланди. Беморнинг биоматериаллари ўрганилгач, унинг маймунчечак билан касаллангани тасдиқланди. Бемор изоляция қилинган, касаллик енгил шаклда.
«Роспотребнадзор»нинг хабар беришича, бемор билан контактда бўлган шахсларнинг барчаси аниқланган ва шифокорлар назоратига олинган. «Эпидемиологик текширув ўз вақтида бошлангани сабабли инфекциянинг янада кенг тарқалиши эҳтимоли тўхтатилди», — дея қўшимча қилди бошқарма.
2022 йилнинг май ойида Европа ва Американинг бир қанча мамлакатларида маймунчечак инфекциясининг илк ҳолатлари аниқланган эди. Жаҳон соғлиқни сақлаш ташкилоти маълумотларига кўра, йил бошидан 27 июнгача бўлган вақтда 50 та давлат ва ҳудудда 3413 кишида касаллик аниқланган, бир киши вафот этган. Касалланиш ҳолатларининг 86 фоизи Европада қайд этилган. Касаллик тез-тез учрайдиган Африкада эса атиги 2 фоиз ҳолатлар аниқланган.
Июнь ойида ЖССТ маймунчечак эпидемиясини халқаро аҳамиятга молик фавқулодда ҳолат деб эълон қилмасликка қарор қилди. Ташкилот, шунингдек, маймунчечак вируси номини ўзгартиришга қарор қилди, аммо ҳали янги ном тақдим этмади.
Изоҳ (0)