Birlashgan Millatlar Tashkiloti bosh kotibi Antoniu Guterrish Shri-Lankada hokimiyatning bosqichma-bosqich topshirilishini ta’minlash uchun muloqotga chaqirdi. Uning so‘zlari BMT saytida keltirilgan.
“U Shri-Lanka xalqiga birdamlik ko‘rsatib, barcha manfaatdor tomonlarni hokimiyatning silliq topshirilishini ta’minlash va iqtisodiy inqirozga barqaror yechim topish uchun muloqotga chaqiradi”, — deyiladi bayonotda.
Guterrish zo‘ravonliklarni qoralashini va aybdorlarning javobgarlikka tortilishi tarafdori ekanini qo‘shimcha qildi. Bosh kotib mamlakat tinchligini saqlashni muhim vazifa deb atadi.
Shri-Lankada iqtisodiy muammolar kuchaygani sababli norozilik namoyishlari bahorda boshlangan. 9-iyul kuni namoyishchilar prezident Gotabay Rajapaksaning rasmiy qarorgohini egallab oldi va bosh vazir Ranil Vikramasingxning shaxsiy uyiga o‘t qo‘ydi. Mahalliy ommaviy axborot vositalarining xabar berishicha, kamida 45 namoyishchi jarohat olgan.
Rajapaksa va Vikramasingx o‘z lavozimlarini tark etishga rozi bo‘ldi. Ular bilan birga besh vazir ham ketishga qaror qildi.
Parlament spikeri Mahinda Yapa Abeyvardenaning aytishicha, davlat rahbari 13-iyul kuni iste’foga chiqadi, shundan so‘ng Abeyvardenaning o‘zi muvaqqat prezident bo‘ladi. Bosh vazir esa yangi umumpartiyaviy hukumat tuzilganidan keyin o‘z lavozimini tark etadi.
Namoyishchilar prezident va hukumat iste’foga chiqmaguncha davlat rahbarining qarorgohini tark etishdan bosh tortdi.
Izoh (0)