Ijtimoiy tarmoqlarda Qashqadaryo viloyatining Shahrisabz tumani hokimi fermerning bug‘doyini o‘g‘irlagani haqida xabar berildi. Tuman hokimligi axborot xizmati esa bu xabarni rad etdi.
“Shahrisabz tumanidagi ‘Ashurov Yorqin Istamovich’ fermer xo‘jaligidagi g‘alla o‘rib ketilgani bilan bog‘liq videoaxborotlar tarqaldi. Unda fermer Yorqin Ashurov dala maydonidagi o‘rim-yig‘im ishlari 2022-yilning 22-iyun kuni boshlanganini, o‘sha kuni tungi soat 02:00 gacha o‘rim bo‘lgani va 9 gektar yerdan 50 tonna g‘alla topshirganini aytadi. Aslida esa ‘Ashurov Yorqin Istamovich’ fermer xo‘jaligida 2022-yilgi g‘alla hosili uchun o‘rim-yig‘im ishlari joriy yilning 23-iyun kuni boshlanib, 25-iyun kuni nihoyasiga yetgan. O‘rganishlar natijasida yig‘ilgan hujjatlar fermer keltirgan raqamlarni butkul rad etmoqda. 23-iyun kuni Yorqin Ashurov 7,5 tonna, 24-iyun kuni 36,64 tonna, 25-iyun kuni esa 24,76 tonna bug‘doy o‘rib topshirgan. Uning jami 20,9 gektarlik g‘alla maydonidan olingan hosili 68,9 tonnani tashkil etgan. Bu raqamlar fermer o‘zi imzo qo‘yib, muhr bosgan yuk xatlarida ko‘rsatib o‘tilgan”, — deyiladi hokimlik axborotida.
Ta’kidlanishicha, “Ashurov Yorqin Istamovich” fermer xo‘jaligi va “Shahrisabz baraka don” MCHJ g‘allachilik klasteri o‘rtasida tuzilgan fyuchers shartnomasiga asosan fermer unga yil davomida xizmat ko‘rsatib kelgan klasterga gektariga 35 tonnadan jami 73,1 tonna bug‘doy topshirishi shart bo‘lgan.
“Ammo fermer shartnoma shartlarini buzib, klasterga g‘allani 4,2 tonna kam topshirgan. U o‘rim-yig‘im ishlarida to‘liq ishtirok etgan. Keyinchalik g‘alla sotish shartnomaviy rejasi bajarilmay qolgach, ishchilariga oylik maosh sifatida va’da qilingan bug‘doyni to‘lashdan qochish maqsadida ijtimoiy tarmoqlar orqali turli yolg‘on bo‘htonlar tarqatishni reja qilgan va amalga oshirgan. Fermer xo‘jaligining ikki nafar — biri 68, biri esa 58 yoshli ishchisi ham fermer Yorqin Ashurov tuman hokimiga tuhmat qilganini, o‘zini bloger deb tanishtirgan shaxs bilan birga ularga tuhmat so‘zlarni o‘rgatib, tuhmat qildirganini bayon qilgan”, — deyiladi mas’ullar axborotida.
Qo‘shimcha qilinishicha, fermer 2019—2021-yillar davomida biror marta ham paxta va g‘alla shartnomaviy rejasini bajarmagan.
“Fermer bug‘doylar ‘ximpunkt’ga to‘kilayotganini, u yer zahar ekanini aytib o‘tgan. Aslida u aytib o‘tgan joy ‘Amir Temur’ hududidagi mineral o‘g‘itlar tarqatish shoxobchasi bo‘lib, unda qariyb 30 yildan buyon hech qanday kimyoviy vositalar saqlanmagan. Sanitariya epidemiologik osoyishtalik va jamoat salomatligi xizmati markazi Qashqadaryo viloyati boshqarmasi hududni o‘rganmay, uning qachonlardir ‘kimyoviy o‘g‘itlar omborxonasi’ bo‘lganini asos qilib, bu yerda bug‘doy saqlashni maqsadga muvofiq emas deb topgan.
Biroq mazkur maydondan tuproqlar olinib, Respublika sanitariya epidemiologik osoyishtalik va jamoat salomatligi xizmati tomonidan o‘tkazilgan tekshirish natijalariga ko‘ra tuproq namunalarida turg‘unlik darajasi yuqori bo‘lgan xlororganik pestitsidlar qoldiqlarini o‘rnatilgan tartibda tekshirish o‘tkazganida tuproq namunalarida turg‘un xlororganik moddalar belgilangan me’yordan yuqori emasligi aniqlangan. Bu haqda joriy yilning 6-iyul kuni Respublika sanitariya epidemiologik osoyishtalik va jamoat salomatligi xizmati bug‘doy saqlash mumkinligi to‘g‘risida xulosa bergan”, — deydi hokimlik axborot xizmati rahbari Bahodir Halimov.
Mas’ulning qo‘shimcha qilishicha, Shahrisabz tuman hokimligi Yorqin Ashurov va boshqalarni jamoatchilikni o‘zining g‘arazli va past niyatlarda turli uydirma, bo‘htonlardan iborat bo‘lgan axboroti orqali tuman hokimiga nisbatan salbiy fikrlar uyg‘otishga uringan deb hisoblagan. Hamda holat yuzasidan aybdor shaxslar doirasini to‘liq aniqlash va qonuniy qaror qabul qilish uchun to‘plangan hujjatlarni tuman IIBga yuborgan.
“Yorqin Ashurov va boshqalarga nisbatan Jinoyat kodeksining 139-moddasi (tuhmat) bilan jinoyat ishi qo‘zg‘atilib, tergov harakatlari olib borilmoqda. Kelgusida tergov organlari tomonidan aybdor shaxslar doirasi aniqlanadi, haqiqat qaror topadi va javobgarlarga jazo muqarrarligi ta’minlanadi”, — deydi mas’ul.
Izoh (0)