“O‘zbekiston 24” telekanalida efirga uzatilgan “Menimcha” ko‘rsatuvi boshlovchisi Xayrulla Nuriddinov Qoraqalpog‘istondagi vaziyat borasida gapirar ekan, mamlakatdagi kamchiliklarni tanqid qiluvchi ijtimoiy tarmoq vakillarini tanqid qildi.
O‘zbekiston jamiyatida bitta toifa mavjud. O‘sha toifa ijtimoiy tarmoqda o‘tirib olib, bitta ensaqotar gapni bot-bot aytib turadi. Shunisi ahamiyatliki, o‘sha qatlamning uslubiyati, dastxati hech qachon o‘zgarmaydi, doim bir xil. O‘sha ensaqotar gapni shu qatlam doim aytib kelgan.
O‘sha toifa uchun aslida mamlakatning taqdiri xalqning qismati ikki pulga qimmat masala. Bugungi O‘zbekiston avvalgisidan osmon-u zamindek farq qilsa ham, o‘sha gapidan voz kechmaydi o‘sha toifa.
Gap nima haqida ketyapti? Gap shundaki, avval ham, bugun ham O‘zbekistonda mabodo bitta muammo chiqsa, qaysidir mahallada svet o‘chib qoladimi, kimningdir ochko‘zligi sabab mahsulot qimmatlashadimi yoki qaysidir noinsof mutasaddining aybi bilan qaysidir tashkilotda oylik maoshi kechikadimi, xullas, nimaiki muammo chiqsa, boyagi toifa ijtimoiy tarmoqdagi tuynugida darrov zahar sochadi. “Zato osmonimiz musaffo-da”, deb kesatadi. “Zato osmonimiz musaffo-ku, shuning o‘ziga ovunamiz-da endi”, deb zaharxanda qiladi.
O‘sha kesatiq gapni eshitganimda nuqul aytgim keladi – “Hoy, unaqa demang, osmon musaffoligi, ya’ni tinchlik xuddi nonga, onamizga, dinimizga o‘xshagan muqaddas tushuncha. Bu tushunchani mazax qilib bo‘lmaydi, yomon bo‘ladi” degim kelaverardi.
Bu bilan hazillashmang, bu tushuncha bilan o‘ynashmang. Agar Xudo ko‘rsatmasin, o‘sha sizning kesatig‘ingizga sabab bo‘layotgan, nishon bo‘layotgan osmon musaffoligi, tinchlik zabun ko‘rsa, dodingizni kimga aytasiz, degilarim kelardi. Lekin bu gapim bilan o‘zim ham yomon niyatni tilga olayotgan bo‘lib chiqaman-ku, deb tilimni tizginga solgandim. Bugun aytishga jazm qildim shu gapni, — deydi jurnalist Xayrulla Nuriddinov.
Izoh (0)