Surxondaryoda sifatsiz, inson salomatligi uchun zararli tovar-moddiy boyliklar zararsizlantirildi. Bu haqda O‘zA xabar qildi.
Qayd etilishicha, Surxondaryo viloyati boshqarmasi, tuman, shahar bo‘limlari sud qarorlariga asosan mamlakat hududiga fuqarolar va ayrim tadbirkorlar noqonuniy olib kirgan, tegishli hujjat hamda ruxsati mavjud bo‘lmagan mahsulotlarni yo‘q qilmoqda.
Navbatdagi ana shunday tadbirda Termiz tumani Kattaqum massividagi maxsus poligonda jinoyat ishlari bo‘yicha sudlarning ijro hujjatlari ijrosini ta’minlash uchun byuroning viloyat boshqarmasi hamkor tashkilotlar va xolislar ishtirokida 10 turdagi 337 million so‘mlik iste’molga yaroqsiz dori vositalari, 30 dona alkogol va belgilangan tartibga ko‘ra aksiz markalanmagan 10 quti tamaki mahsulotini zararsizlantirgan.
Ma’lumotlarga ko‘ra, joriy yilning o‘tgan davrida MIB viloyat boshqarmasi, tuman, shahar hududiy bo‘limlari tegishli tartibda mazkur toifadagi 1 milliard 912 million 506 ming so‘mlik iste’molga yaroqsiz tovar-moddiy boyliklarni yo‘q qilgan. Zararsizlantirilgan mahsulotlarning 469 million 300 ming so‘mligi orgtexnika, 988 million 378 ming so‘mligi alkogol mahsulotlari, 414 million 527 ming so‘mligi tamaki, 644 ming so‘mligi oziq-ovqat tovarlari, 377 million 856 ming so‘mligi boshqa turdagi iste’molga yaroqsiz tovar-moddiy boyliklar hisoblanadi.
Shuningdek, davlat daromadiga o‘tkazilishi belgilangan mol-mulklarning arzonlashtirilgan savdo do‘konlari orqali sotilishidan tushgan mablag‘ning 679 million 731 ming so‘mi “temir daftar”, “ayollar daftari” va “yoshlar daftari” maxsus jamg‘armalariga o‘tkazib berilgan.
Izoh (0)